Мост у Менску на Нямізе часткова абрынуўся 8 студзеня, а 11 студзеня ўжо цалкам разабраны. Фота па заканчэнні разбору моста апублікавала дзяржаўная агенцыя «Минск-Новости».
Мост у самым цэнтры Менску, ля Верхняга гораду, над вуліцамі Няміга і Максіма Багдановіча, па якім ідзе праспект Пераможцаў (працяг вуліцы Леніна), быў збудаваны ў 1962 годзе, апошні раз яго рэмантавалі ў 2017-м. Ноччу 8 студзеня 2021 года абрынулася пешаходная частка моста. Цудам ніхто не пацярпеў. Следчы камітэт завёў дзве крымінальныя справы.
Гарадскія ўлады абяцалі разабраць мост за тыдзень, а новы – збудаваць цягам месяца. Паведамлялі, што дэмантажом абваленых пралётаў моста на Нямізе займаюцца каля 30 чалавек, задзейнічана да 25 адзінак тэхнікі.
АА belsat.eu