Таксіст у Маладзечне выкінуў з аўтамабіля жанчыну, калі даведаўся, што тая – работніца падатковай інспекцыі і праводзіць кантрольныя мерапрыемствы.
Сайт УУС Менгарвыканкаму паведамляе, што кіроўца таксі выцягнуў інспектарку, схапіўшы за ногі. На кіроўцу завялі крымінальную справу.
Паводле прэс-службы Маладзечанскага РАУСу, кіроўца таксі давёз жанчыну да пункту прызначэння, узяў плату за паездку гатоўкай і не выдаў чэку. У сваю чаргу жанчына паказала кіроўцу пасведчанне падатковага інспектара і папрасіла прайсці ў «будынак дзяржоргану».
«Кіроўца таксі, ігнаруючы патрабаванні службовай асобы, не стаў выходзіць з аўтамабіля і працягнуў рух. На бліжэйшым аўтобусным прыпынку ён сілай, схапіўшы жанчыну за ногі, выцягнуў яе з машыны і з’ехаў у невядомым напрамку».
Паводле міліцэйскай інфармацыі, аператыўнікі хутка высветлілі асобу нелегальнага таксіста. Ім аказаўся 45-гадовы жыхар Маладзечна. У дачыненні кіроўцы распачатая крымінальная справа паводле ч. 1 арт. 366 («Гвалт або пагроза гвалтам у дачыненні службовай асобы»).
Мужчыну пагражае да 7 гадоў пазбаўлення волі.
ЗК belsat.eu