Следчы камітэт заявіў, што скончыў расследаванне чарговай палітычнай справы супраць актывістаў анархісцкага руху.
Паводле СК, нявыяўленыя асобы пры непасрэдным удзеле трох абвінавачаных, дваіх мужчынаў і дзяўчыны (31, 29 і 26 гадоў адпаведна), з 2005 да 2020 года мелі аўтаномныя суполкі ў рэгіёнах са сваймі нефармальнымі лідарамі, збіралі грошы, стварылі краму для продажу літаратуры, адзення і іншай атрыбутыкі, шукалі аднадумцаў. Імёны фігурантаў не называюцца, але ёсць падставы меркаваць, што сярод абвінавачаных – праваабаронца Марфа Рабкова.
Адзначаецца, што 31-гадовы лідар ужо быў пад судом у 2011 годзе за ўдзел у шэрагу радыкальных акцый у Менску разам з Ігарам Аліневічам, Мікалаем Дзядком, Дзмітрыем Дубоўскім і іншымі прадстаўнікамі анархісцкага руху.
Таксама ў СК заяўляюць пра датычнасць 31-гадовага мужчыны і 26-гадовай дзяўчыны да падпалу падатковай інспекцыі Гомельскага раёну ў сакавіку 2017 года з выкарыстаннем кактэйляў Молатава. Іншых анархістаў, у тым ліку 24-гадовага жыхара Берасця, вінавацяць у тым, што яны ў чэрвені 2016 года кінулі ў будынак ГУБАЗіКу дымавую шашку.
Апроч таго, заяўляецца пра датычнасць фігурантаў да пашкоджання ў 2016–2020 гадах банераў з выявай праваахоўнікаў, фасадаў розных будынкаў, у тым ліку будынку Белтэлерадыёкампаніі, а таксама да падпалу білборда ў Івацэвічах. Вінавацяць анархістаў у перакрыцці дарог і блакаванні руху ў сакавіку 2017 года і траўні 2018-га ў Берасці.
Закідаюць падвіноўным і тое, што яны ў жніўні 2020 года распаўсюджвалі інфармацыйныя матэрыялы, якія змяшчаюць звесткі аб месцах і часе збору ўдзельнікаў пратэстаў.
У асобнае вядзенне вылучаная крымінальная справа ў дачыненні 26-гадовага Дзмітрыя Леўчука, 24-гадовага Артура Кандратовіча, 29-гадовых Рамана Халілава і Яўгена Жураўскага, якія цяпер жывуць у іншых краінах. Следства сцвярджае, што 29 верасня 2021 года Халілаў і Жураўскі разам з іншымі асобамі каля амбасады Беларусі ў Польшчы правялі акцыю пратэсту, падтрымліваючы Андрэя Зельцара.
Дзеянні дзесяці фігурантаў у залежнасці ад ролі кожнага з іх кваліфікаваныя паводле Крымінальнага кодэксу:
Аанархісты змешчаныя пад варту. Справу перадаюць пракурору для накіравання ў суд.
МГ belsat.eu