107-ы дзень пратэстаў. Кацярына Андрэева ў жодзінскай турме, амапаўцы супраць людзей сталага веку

Панядзелак 23 лістапада стаў 107 днём паслявыбарчых пратэстаў у Беларусі. «Белсат» падводзіць вынікі гэтага дня.

Кацярыну Андрэеву этапавалі ў жодзінскую турму

Кацярыну Андрэеву перавялі ў Жодзінскую турму. Ці тое ж адбылося з Дар’яй Чульцовай пакуль невядома. Але ў ІЧУ на Акрэсціна яе ўжо няма.

Кацярына Андрэева і Дар’я Чульцова. Фота: belsat.eu і архіў гераіні

Кацярыну Андрэеву і Дар’ю Чульцову затрымалі 15 лістапада падчас стрыму з плошчы Пераменаў. Журналісткам прысудзілі адміністрацыйны арышт, а таксама высунулі абвінавачванне паводле ч. 1 арт. 342 КК «Арганізацыя і падрыхтаванне дзеянняў, якія груба парушаюць грамадскі парадак». Вядома, што ў дачыненні да Кацярыны прымянілі меру стрымання – два месяцы арышту.

Дар’і Чульцовай і Кацярыне Андрэевай пагражае да трох гадоў зняволення толькі за тое, што яны сумленна выконвалі сваю працу.

АМАП супраць людзей сталага веку

У сталіцы сёння адбыўся марш мудрасці, традыцыйная акцыя ў якой бяруць удзел людзі сталага веку. Удзельнікі акцыі патрабуюць адстаўкі Аляксандра Лукашэнкі з паста кіраўніка краіны. Акцыя пачалася ў абед каля Чырвонага Касцёлу на плошчы Незалежнасці.

Марш мудрасці ў Менску. 23 лістапада 2020 г. Фота: Агата Квяткоўская / «Белсат»

Раней у маршах мудрасці таксама бралі ўдзел медыкі і студэнты. Амапаўцы пераследавалі калону мітынгоўцаў, спрабавалі спыніць людзей. Есць затрыманыя.

Марш мудрасці ў Менску. 23 лістапада 2020 г. Фота: Агата Квяткоўская / «Белсат»

У Беларусі 132 асобы прызналі палітвязнямі

Беларускія праваабарончыя арганізацыі выступілі ў супольнай заявай, у якой патрабуюць неадкладнага вызвалення палітзняволеных студэнтаў і выкладчыцы БДУІР.

Акцыя «Вершы на прыступках» каля БДУІР. Менск, Беларусь. 15 верасня 2020 г. Фота: ТК / belsat.eu

12 лістапада міліцыянты затрымалі лідараў і актывістаў Задзіночання Беларускіх Студэнтаў (ЗБС). 23 лістапада Глебу Фіцнеру, Іллі Трахтэнбергу, Марыі Каленік, Вікторыі Гранкоўскай, Анастасіі Булыбенка, а таксама затрыманай выкладчыцы БДУІР Вользе Філатчанкавай высунулі абвінавачванні і абралі меру стрымання ў выглядзе ўтрымання пад вартай.

Праваабаронцы ў сваю чаргу падкрэсліваюць, што пераслед студэнтаў і выкладчыкаў звязаны з выключна мірным ажыццяўленнем абвінавачанымі свабодаў, гарантаваных Канстытуцыяй і міжнароднымі нормамі ў галіне правоў чалавека – свабоды выказвання свайго меркавання і свабоды мірных сходаў. Абвінавачванні, якія агучыла следства, з’яўляюцца адвольнымі і палітычна матываванымі.

Агулам праваабаронцы прызналі вязнямі сумлення ў Беларусі 132 асобы.

Паводле «Оксфардскага слоўніку ангельскай мовы», слова «беларускі» стала адным з словаў году

У спісе Оксфардскага слоўніка ангельскай мовы сёлета 16 словаў. Сярод іх – «impeachment, bushfire (лясныя пажары ў Аўстраліі), «coronavirus і COVID-19, lockdown, social distancing і Black Lives Matter». Фактычна ў кожным месяцы бягучага году, які перанасычаны на падзеі, ёсць сваё слова.

А вось у жніўні ў спіс патрапіла слова «Belarusian».

«Пераабранне Аляксандра Лукашэнкі ў жніўні рэзка павялічыла колькасць згадвання слова «беларускі», паколькі падзеі ў Беларусі шырока асвятляліся ў навінах па ўсім свеце», – тлумачаць лінгвісты.

Іна. Фота: Ірына Арахоўская / Belsat.eu

Пераслед грамадзянаў

Адміністратару телеграм-канала «Мiкоlа» Мікалаю Дзядку агучылі абвінавачванне паводле ч. 1 арт. 342 КК (Арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх).

Мікола Дзядок. Фота spring96.org

Мікола Дзядок, якога затрымалі працаўнікі ГУБАЗІК, за кратамі з 12 лістапада.

Брату Дар’і Домрачавай Мікіце далі штраф у Br 540 за ўдзел у нядзельным маршу. Дарэчы, сама Дарʼя Домрачава аніяк не выказалася наконт затрымання і суду брату. У ейных сацсетках няма аніводнага паста датычна гэтай сітуацыі.

100 дзён пратэстаў, Новая Баравая і спілаваная Эйфэлева вежа. Галоўнае за мінулы тыдзень у малюнках

СК belsat.eu

Hавiны