Пікет Беларускага прафсаюзу працаўнікоў радыёэлектроннай прамысловасці (РЭП) цягнуўся ўсяго 40 хвілінаў замест заяўленых трох гадзінаў. Нягледзячы на дазвол сталічных уладаў, акцыі перашкодзіла міліцыя.
Некалькі дзясяткаў актывістаў прафсаюзу РЭП сталі ў шэраг на ходніку па вул. М. Багдановіча. Сярод удзельнікаў былі працаўнікі з Бабруйску, Магілёва, Берасця, Гомля і Наваполацку.
Прыкладна праз 40 хвілінаў пасля пачатку акцыі міліцыя запатрабавала ў пікетоўцаў перайсці ў глыб парку Дружбы народаў, на сцэнічную пляцоўку. Старшыня прафсаюзу працоўных РЭП Генадзь Фядыніч абурыўся, што ўлады санкцыянавалі пікет менавіта на ходніку, але вырашыў на канфлікт не ісці.
«Прыйшлі прадстаўнікі ўлады – убачылі, што нас не пяць чалавек, – патлумачыў Фядыніч «Белсату». – Патэлефанавалі зверху, загадалі перасунуць нас туды. Ну а тут чаго мы будзем стаяць? Хай яны самі тут сядзяць. Раз улада нас заштурхнула сюды, я лічу, што пікет удаўся. Калі б мы нікога не цікавілі, нас ніхто не крануў бы. А так не падабаюцца ім нашы лозунгі».
Старшыня суполкі прафсаюзу на Лукомскай ДРЭС Аляксей Гарбыель прыйшоў на пікет у рабочай форме. Сабе на шыю на ланцугу ён павесіў таблічкі з надпісамі: «Кантракт», «Армія», «КДБ», «МУС», «МНС».
«Я выступаю за тое, каб рабочы, які корміць усіх, сам быў сыты, – патлумачыў «Белсату» Аляксей Гарбыель. – Я наглядна хачу паказаць, што рабочы трымае на сабе: армія, КДБ, МУС ды іншыя. Гэтыя бюджэтнікі атрымоўваюць даволі добры заробак, а сам рабочы, які корміць усіх, застаецца галодны. Я хацеў бы звярнуцца да Міхаіла Мясніковіча. Паважаны Міхаіл Уладзіміравіч, дзе нашае мармуровае мяса? Чаму яго няма ў нашых завадскіх сталоўках?»
Перайшоўшы на бязлюдную сцэну парку, пікетоўцы спынілі сваю акцыю і разышліся.
Таксама сёння сябры Свабоднага прафсаюзу металістаў правялі пікет у сталічным парку імя 50-годдзя Кастрычніка. Там санкцыянаваная ўладамі акцыя прайшла без перашкодаў з боку сілавых структураў.
На 7 кастрычніка ў сусветным календары прыпадае дзень дзеянняў «За годную працу». Гэтая дата адзначаецца з 2008 г. з ініцыятывы Міжнароднай канфедэрацыі прафсаюзаў. 7 кастрычніка ў сотнях краінаў свету рабочыя прафсаюзы праводзяць мітынгі і шэсці, патрабуючы годных умоваў працы.
belsat.eu