Зялко: Беларусы не думаюць не толькі пра пенсіянераў, але і пра сваю будучыню

01.10.201220:52

1 кастрычніка – Дзень пажылых людзей. У Беларусі доля людзей сталага веку сягае 30 % ад усяго насельніцтва і працягвае павялічвацца. Сёння асобаў, старэйшых за 60 гадоў, у краіне ўжо 2 млн. Разам з тым, дагэтуль не створана базы для працы са сталымі людзьмі. Гэта не толькі медычная дапамога, а перадусім сацыяльная апека.

Старшыня аб’яднання пенсіянераў «Нашае пакаленне» Таццяна Зялко зазначае, што беларускія пенсіянеры жывуць у найгоршых сацыяльных і эканамічных умовах у параўнанні з суседнімі краінамі. Разам з гэтым міф пра асаблівае апекаванне дзяржавы пенсіянерамі прыжыўся не толькі за мяжою, але і ў самой Беларусі.«Яны кажуць, што мы жывем лепш за ўсіх, а мы глядзім дзяржаўнае тэлебачанне і верым, бо мы прызвычаіліся верыць у тое, што кажуць улады. Але вывезіце любога пажылога чалавека ў Літву або ва Украіну – і яны будуць шакаваныя», – кажа Таццяна Зялко.Гаворка вядзецца не толькі пра ніжэйшую мінімальную пенсію ў параўнанні з суседнімі краінамі. Да гэтага далучаюцца высокія кошты на ежу і медыкаменты ды адсутнасць ільготаў для беларускіх пенсіянераў.Паводле спадарыні Зялко, праблема ў тым, што чыноўнікі і звычайныя грамадзяне не думаюць не толькі пра пенсіянераў, але і пра сваю будучыню.