Беларуская асацыяцыя журналістаў агучыла вынікі конкурсу «Вольнае слова». Сярод пераможцаў журналісты «Белсату»
Беларуская асацыяцыя журналістаў 10 снежня агучыла вынікі творчага конкурсу «Вольнае слова». На разгляд журы былі пададзеныя больш за 300 працаў.
1 месца ў інфармацыйным жанры атрымаў «Рэпартаж з рукамі за спіною» журналісткі «Белсату» Кацярыны Андрэевай. Рэпартаж быў пра тры дні, якія Кацярына правяла на Акрэсціна. Цяпер Андрэева адбывае пакаранне ў Гомельскай калоніі.
2 месца ў інфармацыйным жанры атрымаў стрым Паўла Свярдлова з «Еўрарадыё», які ён правёў з акцыі прыхільнікаў палітыкі Лукашэнкі. 3 месца ў інфармацыйным жанры атрымаў «Прэс-клуб Беларусь» і Юлія Слуцкая за інтэрв’ю з Марынай Золатавай.
1 месца ў намінацыі «Аналітыка» атрымаў цыкл рэпартажаў Стася Івашкевіча пра фальсіфікацыі на выбарах 2020 года.
У жанры мастацкай публіцыстыкі 1 месца – таксама матэрыялы «Белсата», цыкл «Мне яшчэ пашанцавала».
Мультымедыя праект «Мне яшчэ пашанцавала» спалучае ў сабе тэкставыя і візуальныя мовы аповеду. Калі нашыя героі не маглі знайсці слоў, яны малявалі свае ўспаміны.
Героі праекту – пацярпелыя ад гвалту пасля выбараў 2020 года. Іх гісторыі розныя. Але амаль кожны ў пэўны момант размовы казаў нечаканае: мне яшчэ пашанцавала. Пашанцавала, бо кагосьці збівалі мацней. Пашанцавала, бо змог уцячы з краіны. Пашанцавала… застацца жывым.
Каманда Белсату дакументавала гісторыі па ўсёй Беларусі і Польшчы восенню 2020 года. На той момант частка нашых герояў праходзілі лячэнне або з’ехалі за мяжу. З пацярпелых прадстаўнікі ўлады рабілі і працягваюць рабіць абвінавачаных.
Праект існуе на 6 мовах: беларускай, расейскай, ангельскай, польскай, украінскай і славацкай. Апошнюю мову ў праект дадалі дзякуючы высілкам беларусаў у Славакіі.
«Для каманды праекту прэмія «Вольнага слова» – вельмі каштоўная ўзнагарода. Гэта значыць што наш праект важны для беларусаў», – адзначаюць журналісты «Белсату».
3 месца ў мастацкай публіцыстыцы ў Ганны Галёты за відэа рэпартаж «Як Ніна Багінская тлумачыць паводзіны сілавікоў».
І 2 месца ў намінацыі «Журналісцкае расследаванне» (першае – у расследавання TUT.BY пра «нуль праміле» у Рамана Бандарэнкі) на конкурсе «Вольнае слова» – у матэрыяла Вольгі Ратміравай пра карупцыю ў медыцыне.
Больш за дзесяць гадоў Беларуская асацыяцыя журналістаў называе лепшыя працы калег па пяці намінацыях конкурсу: «Інфармацыя», «Аналітыка», «Мастацкая публіцыстыка», «Журналісцкае расследаванне» і «Дэбют». Сёлета журы агучыла пераможцаў ва ўсіх пяці намінацыях з ліку канкурсантаў, якія даслалі свае творчыя працы за 2020 год.
АА belsat.eu
