З Акадэміі навук звальняюць затрыманых навукоўцаў з «няправільнай» палітычнай пазіцыяй
У Нацыянальнай Акадэміі навук праходзяць звальненні супрацоўнікаў, якія ў выніку палітычнага пераследу апынуліся за кратамі. Пра гэта паведамляе «Зеркало».
«Яшчэ перад доўгімі лістападаўскімі выходнымі ў прэзідыум Акадэміі навук выклікалі дырэктараў інстытутаў і сказалі звольніць тых, хто пасля нядаўняй «аблавы» апынуўся на «соднях», – распавёў суразмоўца выдання.
Гэтак, ужо звольнілі Сяргея Гараніна – намесніка дырэктара ў навуковай працы Інстытуту мовазнаўства імя Якуба Коласа ДНУ «Цэнтр даследаванняў беларускай культуры, мовы і літаратуры» НАН Беларусі, дацэнта кафедры літаратурна-мастацкай крытыкі. Ён правёў дзесяць содняў на Акрэсціна нібы за «дробнае хуліганства».
Агулам сілавікі дапытвалі больш як 40 навукоўцаў, якія былі ў чаце супраць гвалту. Некаторых з іх затрымалі, «у каго нешта не спадабалася ў тэлефоне».
Адзін з іх – кандыдат фізіка-матэматычных навук з Інстытуту хіміі новых матэрыялаў НАН Беларусі, другі – малодшы навуковы супрацоўнік Аб’яднанага інстытуту праблем інфарматыкі НАН. Таксама быў затрыманы прафесар, сябар-карэспандэнт НАН Алег Давыдзенка, які з’яўляецца аўтарам каля 300 навуковых прац у біялогіі і вывеў 19 сартоў раслін.
Якуб Хруст belsat.eu
