Прэзідэнт Украіны Уладзімір Зяленскі звярнуўся з штодзённым зваротам у якім распавёў пра вынікі наступу Збройных сілаў Украіны на Харкаўшчыне. Палітык распавёў пра поспехі арміі і вяртанне кантролю над населенымі пунктамі вобласці.
Збройныя сілы Украіны працягваюць контрнаступ і вызваляюць населеныя пункты, якія раней акупавалі расейцы. Прэзідэнт Украіны Уладзімір Зяленскі распавёў некаторыя падрабязнасці.
«Наша армія, разведка і СБУ працягваюць актыўныя дзеянні на некалькіх аператыўных кірунках. Яны паспяхова працягваюцца. У гэты час Збройныя сілы Украіны вызвалілі і ўзялі пад кантроль больш за 30 населеных пунктаў Харкаўскай вобласці. Працягваюцца мерапрыемствы па правяранні і ахове тэрыторыі ў некаторых вёсках вобласці, паступова бяром пад кантроль новыя населеныя пункты – паўсюль вяртаем украінскі сцяг і абарону ўсім нашым людзям…
Не забываем і пра іншыя кірункі. Жорсткія баі працягваюцца як на Данбасе, так і на поўдні нашай краіны. Прашу ўкраінцаў з вызваленай тэрыторыі: паведамляйце, калі ласка, прадстаўнікам нашых сілаў любую вядомую вам інфармацыю пра злачынствы акупантаў на ўкраінскай зямлі», – заявіў Уладзімір Зяленскі.
Вайна ва Украіне працягваецца ўжо 199 дзён. На працягу апошняга тыдня Украіна распачала контрнаступ і паспяхова вяртае свае тэрыторыі.
Алена Аляксандрава belsat.eu