Што атрымаюць з таго статусу Верхні Горад, Ракаўскае прадмесце і Траецкая гара, невядома, але цяпер гэта гістарычныя кварталы.
Надаць статус гістарычнага кварталу тром часткам сталіцы пастанавіў Менскі гарсавет на 29-й сэсіі 10 верасня, піша дзяржаўнае агенцтва «Минск-новости».
Тлумачаць рашэнне патрэбай у «рэгістрацыі асобных элементаў аб’ектаў і афармлення прадугледжаных заканадаўствам дакументаў з адраснаю прывязкай», а таксама тым, што прапановы былі апублікаваныя ў дзяржаўных газетах, а пярэчанняў не паступала.
Межы гістарычных кварталаў такія:
- Верхні Горад – вуліцы Гарадскі Вал, Няміга, Зыбіцкая, Інтэрнацыянальная, Янкі Купалы і праспект Незалежнасці;
- Ракаўскае прадмесце – вуліцы Ракаўская, Шпалерная, Замкавая, праспект Пераможцаў, вуліцы Няміга, Ракаўская Слабада, Юбілейная плошча;
- Траецкая гара – вуліцы Старавіленская, Камуністычная і рака Свіслач.
У гістарычных кварталах засталося не так шмат гістарычнай забудовы, але ёсць нямала сучасных будынкаў або, у выпадку Верхняга Гораду, навабудаў з хіба намёкамі на гістарычную забудову. Гістарычныя будынкі ў тых раёнах зносілі, у тым ліку 5 гадоў таму знеслі будынкі XIX стагоддзя на скрыжаванні Вызвалення і Шпалернай (цяпер гэта гістарычны квартал Ракаўскае прадмесце) – пазбавіць іх статусу гістарычна-культурнай каштоўнасці прасіў мітрапаліт Павел.
Акрамя таго, Менскі гарсавет пастанавіў захаваць адпаведныя назвы за працягам вуліцаў Галубка ды Ігнатоўскага, а праектаваную вуліцу ў раёне вуліцаў Шаранговіча, Гарэцкага і Рафіева назваць завулкам Максіма Гарэцкага.
АА belsat.eu
