Да былой работніцы «Первого канала» Марыны Аўсяннікавай, якая ў сакавіку выйшла ў жывы эфір тэлеканалу з антываенным плакатам і выступае супраць вайны з Украінаю, прыйшлі з ператрусам паводле справы аб «фэйках» пра расейскае войска, паведамляе «ОВД-Инфо».
Адвакат журналісткі Дзмітрый Захватаў перадае, што аператыўнікі ўварваліся ў дом Аўсяннікавай, не чакаючы адваката.
Раней суд двойчы штрафаваў Аўсяннікаву за «дыскрэдытацыю» ўзброеных сілаў пасля ейных выказванняў супраць вайны. Першы штраф яна атрымала 28 ліпеня – пасля выказванняў каля суда падчас абрання меры стрымання палітыку Іллю Яшыну. Тады Аўсяннікава ў сваім каментары назвала вайну «самым жудасным злачынствам XXI стагоддзя». Суд прызначыў ёй штраф памерам 50 тысячаў расейскіх рублёў (каля 830 долараў). Другі раз яе аштрафавалі на 40 тысячаў рублёў (каля 660 долараў) за «дыскрэдытацыю» ўзброеных сілаў Расеі праз допісы ў Facebook.
Нагадаем, што 14 сакавіка Марына Аўсяннікава ў жывым эфіры праграмы «Время» на «Первом канале» з’явілася з пратэставым плакатам супраць вайны ва Украіне. Перад гэтым жанчына запісала зварот і заклікала расейскія ўлады спыніць ваенныя дзеянні. Пасля яе затрымала паліцыя, пазней суд аштрафаваў на 30 тысячаў рублёў (каля 500 долараў).
Алена Рувіна belsat.eu