У ноч з 9 на 10 жніўня, латвійскія памежнікі затрымалі 65 мігрантаў з тэрыторыі Беларусі, якія незаконна перасеклі мяжу. Усяго за мінулыя содні затрымалі каля 200 мігрантаў, паведаміў начальнік Дзяржаўнай памежнай аховы Гунтыс Пуятс, перадае партал Delfi.lv.
Таксама ён нагадаў, што ў цэнтрах размяшчэння практычна няма месцаў, таму парушальнікаў мяжы прыйдзецца сяліць у палатках. Першапачаткова палаткі плануюць устанавіць паблізу ад пагранічных аб’ектаў.
Па словах Пуятса, мігранты з Беларусі прыбываюць вялікімі групамі, што сведчыць аб прыкметах арганізаванасці. Некалькі разоў уцекачы пераходзілі мяжу групамі па 30 і больш чалавек, а многія мігранты не ведаюць, што прыбылі ў Латвію: яны думалі, што адразу трапяць у Нямеччыну.
У ліку мігрантаў мужчыны, жанчыны і дзеці.
Латвійскія ўлады для аховы мяжы ўвялі ўзмоцнены нагляд і мабілізавалі рэсурсы Дзяржаўнай памежнай аховы і арміі. Падтрымка аказваецца і з боку Еўрапейскага агенцтва памежнай і берагавой аховы «Frontex».
Нагадаем, што пасля таго, як Літва пачала высылаць мігрантаў, якія прыбылі з Беларусі, назад, з 6 жніўня рэзка павялічылася колькасць уцекачоў, якія перасякаюць латвійска-беларускую мяжу.
Сёння, 10 жніўня, урад Латвіі будзе разглядаць пытанне аб абвяшчэнні надзвычайнай сітуацыі ў памежнай зоне каля латвійска-беларускай мяжы.
АД, belsat.eu