ГА «Беларуская асацыяцыя журналістаў» атрымала адказ на свой зварот аб медычнай дапамозе зняволенаму кіраўніку аддзелу рэкламы і маркетынгу «Нашай Нівы» Андрэю Скурко. Міліцыянты не адказалі на ўсё пытанні, паколькі спасылаюцца на таямніцу медычнага характару.
Напрыканцы ліпеня з’явілася інфармацыя, што Андрэй Скурко захварэў у СІЗА на Валадарскага на COVID і яго змясцілі ў медычную частку. БАЖ звярнуўся да МУС са зваротам аб медычнай дапамозе.
Дэпартамент выканання пакаранняў МУС паведаміў, што Андрэй Скурко ў СІЗА №1 знаходзіцца пад дынамічным наглядам медычных працаўнікоў установы і атрымлівае дапамогу ў поўным аб’ёме. Болей у МУС не адказалі, спасылаючыся на таямніцу інфармацыі медычнага характару.
З уласных крыніц БАЖ стала вядома, што зняволены журналіст сапраўды ідзе на папраўку.
З 8 ліпеня працаўнікі «Нашай Нівы» Ягор Марціновіч і Андрэй Скурко знаходзяцца за кратамі. Усяго ў няволі цяпер 29 прадстаўнікоў медыя.
СК belsat.eu