Пракуратура перадала ў суд крымінальную справу супраць 26-гадовай настаўніцы музыкі, якой выставілі абвінавачанне паводле арт. 370 («Здзек з дзяржаўных сімвалаў») Крымінальнага кодэксу. Сілавікі пераследуюць яе за палітычны жарт у сацыяльных сетках.
«Абвінавачваная 31 сакавіка 2021 года з выкарыстаннем мабільнага тэлефона і ўсталяванага на ім прыкладання Twitter змяніла арыгінальны тэкст дзяржаўнага гімну Рэспублікі Беларусь. Пасля чаго размясціла новы тэкст у створаным ёю чат-канале ў сацсетцы, каб прадэманстраваць іншым грамадзянам вынік свайго абразлівага і блюзнерскага стаўлення да дзяржаўных сімвалаў», – заяўляюць у Генеральнай пракуратуры.
Пра затрыманне 26-гадовай настаўніцы менская міліцыя паведаміла 30 красавіка. Сілавікі прымусілі дзяўчыну заявіць на камеру, што яна раскайваецца ў тым, што зрабіла.
Паводле арт. 370 КК, настаўніцы могуць прысудзіць грамадскія працы, штраф ці папраўчыя працы на тэрмін да двух гадоў або арышт ці абмежаванне волі да аднаго года.
ІІ belsat.eu
