Генеральная пракуратура Беларусі выступіла з заявай з нагоды паведамленняў пра катаванні, здзек і псіхалагічны ціск з боку адміністрацыі ІЧ-15 у Магілёве ў дачыненні да палітвязня Арцёма Анішчук, у выніку чаго ён праглынуў металічны прадмет.
У Генпракуратуры адзначылі, што ў калонію выбыў намеснік начальніка аддзелу пракуратуры Магілёўскай вобласці, адказны за нагляд выканання заканадаўства органамі крымінальна-выканаўчай сістэмы і прымусовага выканання.
«Падчас асабістай гутаркі з пракурорскім работнікам Арцём Анішчук не выказваў скаргаў на стан здароўя. На пытанне аб прычынах праглынання іншароднага прадмета растлумачыў, што проста хацеў трапіць у медычную частку. Такім чынам, размешчаная ў адным з Telegram-каналаў інфармацыя не пацвердзілася», – гаворыцца ў заяве ведамства.
Нагадаем, што Вольга Анішчук, жонка асуджанага на два гады калоніі ў справе аб пашкоджанні цвіком машыны жонкі супрацоўніка міліцыі Арцёма Анішчука, расказала, што да ейнага мужа здолеў нарэшце трапіць адвакат: ён прысутнічаў на допыце.
У часе допыту зняволены паведаміў адвакату, што супраць яго чыніла фізічны і псіхалагічны гвалт адміністрацыя Магілёўскай папраўчай калоніі № 15, што гэта адбывалася пастаянна з часу ягонага прыбыцця туды 17 красавіка. У выніку ён «праглынуў металічныя прадметы з мэтаю пазбегнуць далейшых катаванняў».
Зняволены таксама расказаў, што яго прымушалі пад дыктоўку пісаць сваякам лісты, што ўсё нібыта добра, і пісаць адмовы ад сустрэчы з адвакатам. Допыты праводзілі без следчага, у прысутнасці чатырох невядомых асобаў.
Пра катаванні заяўляюць і сваякі іншых фігурантаў справы.
МГ belsat.eu
