Канцлер Нямеччыны Оляф Шольц і прэзідэнт Францыі Эманюэль Макрон правялі 9 траўня перамовы аб бяспецы ЕЗ і пашырэнні аб’яднання. Сярод іншых пытанняў кіраўнікі краінаў абмеркавалі сітуацыю ва Украіне. Падчас брыфінгу Макрон і Шольц заявілі, што настойваюць на правядзенні перамоваў аб спыненні агню на ўмовах Украіны, паведамляе агенцтва «Bloomberg».
Шольц і Макрон таксама ўзнялі пытанне пашырэння Еўразвязу і бяспекі на кантыненце. У тым ліку абмеркавалі магчымасці далучэння некаторых балканскіх краінаў, а таксама Украіны, да ЕЗ. Шольц адзначыў, што Украіна належыць да еўрапейскай сям’і. Таксама палітыкі паведамілі, што іхныя краіны дадуць рэкамендацыі Кіеву на кандыдацтва ў Еўразвяз.
Палітыкі паведамілі, што ўзнялі і пытанне вайны ва Украіне.
«Мы па-ранейшаму сканцэнтраваныя на нашай мэце: зрабіць усё магчымае, каб дабіцца спынення агню, дапамагчы Украіне весці перамовы на ўмовах, якія яна прызнае вартымі, бо нашая пазіцыя ў тым, каб адстойваць суверэнітэт і тэрытарыяльную цэласнасць Украіны», – заявіў Макрон.
Таксама прэзідэнт Францыі дадаў, што неадкладнае спыненне агню і далей застаецца неабходнай умовай для поспеху перамоваў, а канчатковы вывад з Украіны расейскіх войскаў – цяперашняя мэта.
Шольц і Макрон паабяцалі працягнуць ваеннае і фінансавае падтрыманне Украіны.
ЗХ belsat.eu