Расея заявіла, што не плануе закрываць свае амбасады ў Еўропе. Прадстаўнік МЗС РФ адзначыў, што ўсё яшчэ разлічвае на наладжванне дыпламатычных стасункаў з заходнімі краінамі, паведамляе BBC.
МЗС Расейскай Федэрацыі паведамляе, што не збіраецца люстэркава рэагаваць у адказ на жорсткія меры, уведзеныя Захадам супраць РФ у сувязі з вайной ва Украіне.
«Гэта не ў нашай традыцыі. Таму мы лічым, што праца дыпламатычных прадстаўніцтваў важная», – заявіў намеснік міністра замежных справаў Аляксандр Грушко.
Заходнія краіны ўвялі шырокія санкцыі супраць ключавых расейскіх чыноўнікаў, замарозілі актывы расейскага Цэнтрабанку і імкнуцца ўвесці эмбарга на імпарт расейскай нафты. ЕЗ і ЗША імкнуцца падштурхнуць Маскву да спынення ваеннага наступу на Украіну.
Нагадаем, што з 24 лютага, калі пачалася вайна Расеі супраць Украіны, краіны Еўропы пачалі масава высылаць расейскіх дыпламатаў, а таксама была спыненая праца шэрагу дыпламатычных прадстаўніцтваў РФ. У панядзелак у Варшаве амбасадара Расеі ў Польшчы закідалі чырвонай фарбай. Яму не дазволілі ўскласці кветкі на савецкіх могілках у Варшаве ў гонар 77-й гадавіны перамогі над нацысцкай Нямеччынай у Другой сусветнай вайне.
Расея ў адказ накіравала Польшчы ноту пратэсту.
ЗХ belsat.eu
