Украінскія ўлады назвалі магчымыя страты ад уварвання Расеі – не менш за $ 1 трлн, распавёў падчас Усеўкраінскага тэлемарафону намеснік міністра эканомікі краіны Аляксандр Грыбан.
Аднак падлік стратаў Украіны ад вайны яшчэ вядзецца.
«Гэта дакладна мільярды долараў, магчыма, нават да трыльёна долараў. Гэта страты інфраструктуры, медыцынскай інфраструктуры, адукацыйнай. Ёсць некалькі ўзроўняў – дзяржаўны, муніцыпальны, прыватны. Усе гэтыя страты каласальныя. Падлік канчатковы яшчэ вядзецца, але гэта не менш за трыльён долараў. І ў нас сапраўды будзе вельмі шмат працы ў аднаўленні», – паведаміў Грыбан.
У сярэдзіне сакавіка прэм’ер-міністр Украіны Дзяніс Шмыгаль заявіў, што паводле папярэдніх падлікаў на аднаўленне краіны трэба больш за $ 500 млрд.
Так, напрыклад, для адбудовы Чарнігава спатрэбіцца не менш за чатыры гады, заявіў гарадскі галава Уладзіслаў Атрашэнка. «Гэта аптымістычная лічба, якая прадугледжвае, што працы будуць праходзіць хутка і пры належным фінансаванні. Прыкладна год зойме праектаванне, а ўласна аднаўленне і забудова разбураных кварталаў – тры гады», – сказаў ён.
АД belsat.eu