Расейскія вайскоўцы днём 10 красавіка абстралялі ракетамі горад Дняпро і Днепрапятроўскую вобласць, паведаміў кіраўнік Днепрапятроўскай абласной рады Мікалай Лукашук.
Тры ракетныя ўдары прыляцелі на тэрыторыю аэрапорту ў абласным цэнтры. Разбураная таксама інфраструктура побач з аэрадромам. Пацярпелі 6 працаўнікоў службы надзвычайных сітуацыяў, яны цяпер у шпіталях. Падраздзяленне ратаўнікоў трапіла пад варожы ракетны абстрэл, калі разбірала завалы на месцы ранішняй атакі. Адна дзяўчына цяжкапараненая, яе аперуюць.
«Паўторны напад на аэрапорт у Дняпры. Ад яго ўжо не засталося жывога месца. Разбураны і сам аэрапорт, і інфраструктура побач. А ракеты ляцяць і ляцяць. Колькасць пацярпелых высвятляем», – паведаміў Валянцін Рэзнічэнка, кіраўнік Днепрапятроўскай абласной адміністрацыі.
Акрамя таго, у Навапаўлаўцы загінуў адзін мірны жыхар – узяў у рукі касетны боепрыпас. Таксама ў Званэцкім трапілі ракетай у інфраструктурны аб’ект, цяпер там працуюць ратаўнікі. Звесткі пра разбурэнні і колькасць ахвяраў удакладняюцца.
АД belsat.eu
