Дзяржаўная памежная служба Украіны паведамляе пра інцыдэнт, які адбыўся з беларускімі грамадзянамі ў пункце пропуску «Дольск» Луцкай заставы.
Аўтобус з грамадзянамі Беларусі накіроўваўся ва Украіну. Сертыфікаты ПЦР-тэставання на COVID-19, якія былі ў пасажыраў аўтобусу, у памежнікаў выклікалі сумневы ў іх сапраўднасці. Пры больш пільным даследаванні ўкраінскія памежнікі высветлілі, што ў бланках адсутнічаюць неабходныя дадзеныя, а ў некаторых даведках супадаюць нумары.
Агулам было знойдзена 35 падробленых сертыфікатаў ПЦР-тэставання на COVID-19. У выніку памежнікі адмовілі грамадзянам Беларусі ва ўездзе ва Украіну.
Аб гэтым факце былі праінфармаваная Нацыянальная паліцыя Украіны. Цяпер паліцыя будзе вырашаць пытанне, ці распачынаць крымінальную справу па факце падробкі дакументаў.
Нагадаем, на мінулым тыдні некаторыя беларусы скардзіліся на праблемы з уездам ва Украіну: нібыта ўкраінскія памежнікі не прапускалі мужчынаў, якія не маюць віду на жыхарства і не могуць пацвердзіць мэту свайго падарожжа ва Украіну. Але ўкраінскія ўлады падкрэсліваюць, што для грамадзянаў Беларусі дадатковых абмежаванняў на ўезд не ўводзілася.
ІІ belsat.eu