Праз пагаршэнне эканамічнай сітуацыі продажы новых аўтамабіляў у Беларусі абваліліся на 43,5%

Паводле Беларускай аўтамабільнай асацыяцыі (БАА) за першы квартал 2021 года аўтадылеры прадалі 9057 новых аўто. Год таму гэты паказнік перавышаў 16 тысяч, піша belretail.by.

Такім чынам, продажы абваліліся на 43,5%. За ўвесь мінулы год было прададзена 52 768 аўтамабіляў. У параўнанні з 2019 годам гэта -18,2%.

Такая дынаміка першага квартала шмат у чым абумоўлена ўсплёскам продажаў у сакавіку 2020 года, калі ў перыяд дэвальвацыі рубля беларусы скупілі ўсе складскія запасы дылераў.

Падзенне продажаў пачалося з красавіка 2020 года. Асноўнымі прычынамі гэтага трэнду эксперты называюць зніжэнне даходаў насельніцтва, змены пакупніцкіх прыярытэтаў і згортванне аўтакрэдытавання. У 2021 годзе эканамічныя настроі беларусаў не палепшыліся.

Эксперты мяркуюць, што, хутчэй за ўсё, падзенне рынку новых аўтамабіляў сёлета працягнецца. Магчыма, некаторыя дылеры спыняць працу, паколькі продажы аўтамабіляў застануцца на нулявым узроўні. Напрыклад, за першы квартал у Беларусі ніводнай машыны не прадалі такія маркі, як «Шэўрале-Ніва», Mitsubishi, MINI, Maserati і Ford.

ІІ belsat.eu