Міністр замежных справаў Латвіі Эдгар Рынкевіч заявіў, што запыт на экстрадыцыю былога прэтэндэнта на пасаду прэзідэнта Валерыя Цапкалы мусіць быць адхілены:
«Я разглядаю просьбу рэжыму Лукашэнкі аб экстрадыцыі беларускага апазіцыйнага палітыка Валерыя Цапкалы як адкрытую спробу адплаты, і патрабаванне мусіць быць адхіленае. Згодна з латвійскім заканадаўствам, рашэнне прымаюць кампетэнтныя праваахоўныя органы, ацэньваючы ўсе аспекты справы», – напісаў Рынкевіч.
Раней, 8 лютага, на тэлеканале «Беларусь-1» паведамілі, што Следчы камітэт Беларусі накіраваў дакументы ў Генеральную пракуратуру для запыту Латвіі аб экстрадыцыі Цапкалы. Паводле звестак тэлеканалу, ён абвінавачваецца ў шэрагу карупцыйных злачынстваў і ў атрыманні хабару ў асабліва буйным памеры. У сваю чаргу прэс-сакратар Генпракуратуры Латвіі Айга Эйдука паведаміла, што яны пакуль не атрымлівалі запыту ад Беларусі.
Таксама раней Генпракуратура Беларусі звярнулася ў Міністэрства юстыцыі Польшчы з просьбаю аб узяцці пад варту і выдачы заснавальнікаў прызнанага ў Беларусі экстрэмісцкім тэлеграм-каналу «NЕХТА» Сцяпана Пуцілы і Рамана Пратасевіча, для прыцягнення іх да крымінальнай адказнасці.
АД, belsat.eu