Палітычны крызіс у Беларусі працягваецца 518 дзён. «Белсат» падводзіць вынікі гэтага дня.
Аўтар мэмаў пра любоў да памідораў на волі
Анатоль Шалковіч, якога схапілі сілавікі яшчэ 11 лістапада летась, выйшаў на волю.
Марыю Калеснікаву этапавалі
Палітзняволеную Марыю Калеснікаву этапавалі з СІЗА № 1. Пры гэтым адвакаты Марыі не ведаюць, куды яе накіравалі адбываць пакаранне.
Ціск на палітвязняў
Палітзняволеных у «справе студэнтаў» – гэта 12 чалавек – прымушаюць падпісаць прашэнне аб памілаванні, паведамляе «Задзіночанне беларускіх студэнтаў».
Жыхара Гомля Дзмітрыя Гопту асудзілі на 2 гады калоніі за тое, што ён нібыта шпурнуў камень у бок міліцыянтаў. 10 студзеня стала вядома, што 22-гадоваму хлопцу адмовілі ў памілаванні, нягледзячы на тое, што ён мае ментальную хваробу, якая патрабуе догляду і лячэння.
Прысуд у «справе Зельцара»
45-гадовага жыхара Магілёва прызналі вінаватым у публічнай абразе прадстаўніка ўлады пры выкананні ім службовых абавязкаў (арт. 369 КК) і прысудзілі да двух гадоў калоніі агульнага рэжыму. Мужчына нібыта размясціў абразлівыя каментары на адрас застрэленага супрацоўніка КДБ Дзмітрыя Федасюка і ягоных калегаў, паведамляе Генпракуратура РБ.
Крымінальныя справы з нагоды абрынання часткі мосту на Нямізе
Галоўнае следчае ўпраўленне распачало дзве крымінальныя справы па факце абрынання 8 студзеня мосту на Нямізе ў Менску, перадае, паведамляе тэлеграм-канал Следчага камітэту Беларусі.
Yara спыняе супрацу з «Беларуськаліем»
Нарвежская кампанія Yara спыніць набыццё калійных угнаенняў у Беларусі да 1 красавіка. Пра гэта паведамляецца ў заяве кампаніі. Гэта ключавы партнёр «Беларуськалія».
СЛ belsat.eu
