З 16 снежня аўтамабільнае паліва зноў падаражэе. Бензін АІ-95 будзе каштаваць Br 1,54, АІ-98 – Br 1,75, дызельнае паліва – Br 1,54. Кошт АІ-92 не зменіцца (Br 1,43), паведамляе «Белнафтахім».
Гэта будзе 27-е падаражэнне паліва цягам года. Кожны раз кошт павялічваўся на 1 капейку.
«Белнафтахім» інфармуе, што рост коштаў звязаны з «кампенсацыяй выдаткаў НПЗ на набыццё вуглевадароднай сыравіны». Паводле дзяржаўнага канцэрну, сёлета кошт нафты, якая пастаўляецца на беларускія НПЗ, вырас на 27 % (у доларавым эквіваленце) у параўнанні з мінулым годам.
У 2019 годзе Расея плануе ўвесці паэтапнае абнуленне экспартных мытаў на нафту пры адначасовым павышэнні падатку на здабычу карысных выкапняў. Падатковы манеўр прывядзе да таго, што з 2024 года Беларусь будзе набываць сыравіну па сусветных коштах.
ЮВ, belsat.eu
