Камандна-штабныя вучэнні «Непарушнае брацтва – 2022», якія павінны былі прайсці з 10 па 14 кастрычніка ў навучальным цэнтры «Эдэльвейс» у горадзе Балыкчы, адменены Міністэрствам абароны Кыргызстану. Пра гэта паведамляе 24.kg.
Прычыны адмены не названыя. У АДКБ скасаванне вучэнняў пакуль не пракаментавалі.
У чэрвені Мінабароны Кыргызстану паведаміла пра пачатак падрыхтоўкі да арганізацыі вучэнняў «Непарушнае брацтва – 2022». У АДКБ заяўлялі, што гэтыя камандна-штабныя вучэнні накіраваныя на адпрацоўку пытанняў падрыхтоўкі і правядзення міратворчай аперацыі, а таксама задач постканфліктнага ўрэгулявання.
Да ўдзелу ў манеўрах павінны былі быць прыцягнутыя міратворчыя кантынгенты Беларусі, Арменіі, Казахстану, Кыргызстану, РФ і Таджыкістана. Аднак пасля нядаўніх баёў на кыргызска-таджыкскай мяжы ў Кыргызстане пачалі гучаць заклікі, каб таджыкскіх вайскоўцаў на вучэнні не дапусцілі.
Глеб Нержын belsat.eu
