З 9 кастрычніка, згодна з пастановай Міністэрства аховы здароўя Беларусі, у краіне ўводзіцца масачны рэжым. Дакумент абавязвае насіць маскі ў грамадскіх месцах і прытрымлівацца бяспечнай дыстанцыі ў 1-1,5 метра. Таксама кіраўнікі розных аб’ектаў і арганізацый павінны забяспечыць кантроль за выкананнем правілаў.
Аднак пра адказнасць за парушэнні правілаў нічога не сказана.
Рэдакцыя парталу «Office Life» распавядае, што раней галоўны санітарны лекар Аляксандр Тарасенка абяцаў маніторынгі выканання гэтых правілаў, у тым ліку з удзелам міліцыі. Ён адзначыў, што спачатку парушальнікаў будуць проста пераконваць, а потым магчымая адказнасць. Але нідзе не гаворыцца пра канкрэтныя штрафы.
Аднак у КаАП ёсць артыкул, які трапляе пад гэты пункт – арт. 17.5 («Парушэнне санітарна-эпідэміялагічных патрабаванняў»).
Згодна з артыкулам, за парушэнне патрабаванняў магчымы наступныя меры:
- фізасоба рызыкуе заплаціць да 30 базавых велічынь (цяпер – да 870 рублёў);
- індывідуальны прадпрымальнік – да 200 базавых (да 5800 рублёў);
- юрыдычная асоба – да 500 базавых (да 14 500 рублёў).
Аднак ці будуць караць штрафамі тых, хто адмаўляецца ад нашэння масак у грамадскіх месцах, пакуль невядома.
АД, belsat.eu
