Пра сустрэчу з прадстаўніком Ватыкану паведамляе сайт Міністэрства замежных справаў Беларусі.
Адзначаюць, што падчас сустрэчы міністра Уладзіміра Макея і апостальскага нунцыя ў Беларусі, арцыбіскупа Антэ Ёзыча абмяркоўваліся «актуальныя пытанні двухбаковага парадку дня, гуманітарная супраца, а таксама ўзаемадзеянне дзвюх дзяржаваў у межах міжнародных арганізацыяў».
Сустрэча адбылася на фоне скандалу з абразліваю публікацыяй прапагандысцкай газеты «Мінская праўда», якая фактычна прыраўняла каталіцкіх святароў да нацыстаў: на малюнку крыж пераўтвараўся ў свастыку. Публікацыя «Мінскай праўды» выклікала хвалю абурэння як сярод каталікоў, так і сярод прадстаўнікоў іншых канфесіяў ды нават атэістаў.
З заяваю выступілі каталіцкія біскупы Беларусі, назваўшы карыкатуру і артыкул выдання «свядомым і зламысным скажэннем праўды, паклёпам і абразай». Яны таксама выказалі спадзеў, што «адпаведныя органы дзяржаўнай улады дадуць належную прававую ацэнку карыкатуры і публікацыі ў газеце «Мінская праўда».
У прэс-рэлізе МЗС наўпрост не згадваецца публікацыя «Мінскай праўды», але паведамляюць, што Макей падкрэсліў «непахіснасць афіцыйных падыходаў у дачыненні Рымска-каталіцкай Царквы ў Беларусі, недапушчальнасць распальвання рэлігійнай нецярпімасці і важнасць захавання ў краіне этна-канфесійнай згоды ў цэлым».
«У гэтым кантэксце не варта надаваць ніякага значэння асобным, выключна суб’ектыўным спробам намаляваць сітуацыю інакш», – адзначылі ў прэс-службе ведамства.
ІІ belsat.eu