«Белсат» падводзіць вынікі чацвярга, 9 верасня – 395 дня паслявыбарчага пратэсту ў Беларусі.
У Маскве прайшлі перамовы Пуціна і Лукашэнкі
Гэта ўжо іх пятая сустрэча з пачатку года.
Перамовы Лукашэнкі і Пуціна, якія зацягнуліся на чатыры гадзіны, прайшлі ў фармаце рабочага абеду. Па выніках сустрэчы прайшла прэс-канферэнцыя.
Асноўныя вынікі сумеснай сустрэчы:
- узгоднены і падпісаны ўсе 28 праграм па Саюзнай дзяржаве;
- прынята рашэнне зняць усе кавідные абмежаванні, якія тычацца авіяцыйнага транспарту;
- цана на расейскі газ для Беларусі ў 2022 годзе яна будзе такой жа, як і ў гэтым годзе;
- агульны аб’ём крэдытаў з верасня бягучага года да канца 2022 складзе каля 630 мільёнаў долараў;
- фарміраванне адзінай абароннай прасторы для Расеі і Беларусі для забеспячэнне бяспекі;
- стварэнне адзінага рынку нафты і нафтапрадуктаў, а таксама дагавор аб адзіным рынку электраэнергіі.
Рашэнне аб увядзенні адзінай валюты пакуль адкладзена, заявіў Лукашэнка.
Далей прэм’ер-міністры дзвюх краін у Менску 10 верасня абмяркуюць праекты саюзных праграм.
Пад час сустрэчы каля расейскай амбасады ў Варшаве прайшла акцыя пратэсту супраць інтэграцыі Расеі і Беларусі.
Расея экстрадуе ў Беларусь яшчэ аднаго ўдзельніка пратэстаў
Белгарадскі абласны суд пастанавіў экстрадаваць 31-гадовага берасцейца Вадзіма Дубойскага, якога вінавацяць у Беларусі ў масавых беспарадках.
У Беларусі яму пагражае да васьмі гадоў турмы.
Берасцейца затрымалі на адной з акцыяў пратэсту ў жніўні. Паводле Дубойскага, у склепе берасцейскага Дому правасуддзя яго білі тры дні, пасля чаго адпусцілі дамоў. Калі Дубойскі атрымаў даведку пра пабоі, яго затрымалі і павезлі ў Следчы камітэт. Пасля тыдня ў ІЧУ мужчыну далі падпіску пра нявыезд.
У верасні Вадзім Дубойскі паехаў у Маскву і яго абвесцілі ў вышук паводле справы аб удзеле ў масавых закалотах.
У магілёўскім шпіталі памёр міліцыянт, які спрабаваў скончыць жыццё самагубствам
25-гадовы міліцыянт Раман Міранкоў здзейсніў спробу суіцыду 2 верасня, стрэліўшы сабе ў галаву ў прыбіральні Ленінскага РАУС Магілёва. Нягледзячы на цяжкую траўму, ён выжыў і амаль тыдзень быў падлучаны да апарату забеспячэння жыццядзейнасці.
Прычынаю спробы суіцыду называюць непраходжанне пераатэстацыі: з крымінальнага вышуку Міранкова перавялі ва ўчастковыя інспектары міліцыі.
За ўвесь гэты час МУС ніяк не пракаментаваў здарэння.
Тры гады «хатняй хіміі» і Br 1500 маральнай шкоды за абразу супрацоўніка ДАІ
Жлобінскі раённы суд 9 верасня абвесціў Арцёму Барашку вырак у крымінальнай справе за абразу службовай асобы.
Пацярпелым у справе выступаў супрацоўнік ДАІ з Ганцавічаў Ігар Вольніч, які 20 чэрвеня мінулага года пры затрыманні стаў нагою на шыю мужчыны. Пасля гэтага відэа са здарэннем нарабіла шмат шуму ў інтэрнэце.
Пасля гэтага Барашка ў сацыяльнай сетцы «Одноклассники» змясціў пад фота з тым інцыдэнтам каментар абразлівага зместу: «п…р».
Суддзя Ігар Змушко вынес прысуд: тры гады абмежавання волі без накіравання ва ўстанову адкрытага тыпу («хатняя хімія») і Br 1500 кампенсацыі маральнай шкоды.
Гарадзенскі блогер Вадзім Ермашук «Vadimati» атрымаў яшчэ 15 содняў арышту па новым артыкуле
Нагодай для новага пратаколу стаў нібыта званок блогера ў службу 115, падчас якога ён нецэнзурна выказаўся пра сістэму ЖКГ і гарвыканкам. Суд па новай справе распачаўся 8 верасня і праводзіўся па відэасувязі.
Затрымалі блогера ў Шчучыне 16 жніўня. На трэція содні пасля затрымання – 19 жніўня, Ермашука асудзілі на 25 содняў арышту ў Шчучынскім раённым судзе па арт. 24.23 КаАП за нібыта заклікі прыехаць на спартовае масавае мерапрыемства – скейт-пляцоўку ў Шчучыне.
Медаль Крысціны Ціманоўскай перададуць у Музей Вольнай Беларусі
Медаль беларускай спартоўкі Крысціны Ціманоўскай, які яна прадала на аўкцыёне за $ 21 000, увойдзе ў экспазіцыю Музею Вольнай Беларусі. Пра гэта паведаміў Фонд спартовай салідарнасці.
Срэбны медаль Другіх Еўрапейскіх гульняў набыў жыхар ЗША Яўген. Ён пераехаў з Кіева ў Амерыку 30 гадоў таму.
АД, belsat.eu
