Палітвязень Арцём Баярскі зможа працягнуць вучобу ў літоўскім універсітэце як толькі выйдзе на волю, паведамляе тэлеграм-канал «Вясны».
Арцёма залічылі ў Каўнаскі ўніверсітэт Вітаўтаса Вялікага на бакалаўрскую праграму «Біятэхналогія». Як толькі 20-гадовы палітвязень апынецца на волі, ён зможа працягнуць вучобу па сваёй спецыяльнасці.
Да арышту Арцём быў студэнтам хімфака БДУ. Ён чатыры разы станавіўся стыпендыятам Спецыяльнага фонду прэзідэнта па падтрымцы таленавітай моладзі і адораных студэнтаў і навучэнцаў, але ў жніўні мінулага году адмовіўся ад прэзідэнцкай стыпендыі ў знак пратэсту. Школьнікам ён чатыры разы займаў прызавыя месцы на нацыянальных алімпіядах у хіміі.
Мінулай восенню яго асудзілі на 15 содняў па артыкуле 24.23 КаАП за бел-чырвона-белы сцяг, які вісеў на 11-м паверсе ягонага інтэрнату.
Гэтай вясной Арцёму спачатку прысудзілі 25 содняў па тым жа артыкуле. Потым на яго завялі крымінальную справу за «стварэнне экстрэмісцкага фармавання» (ч. 1 арт. 361 КК РБ). Каб атрымаць відэа, дзе студэнт прызнаецца ў адміністраванні пабліка, сілавікі моцна збілі Арцёма.
Пасля затрымання студэнта хімфака выключылі з БДУ.
АД, belsat.eu