Сустрэча Ціханоўскай і Байдэна, крызіс з мігрантамі на мяжы. Падзеі мінулых 2 тыдняў у карцінках
Мастак Дэ Лёс чытае навіны і ілюструе іх.
Апошнія 2 тыдні, як, уласна, і ўвесь год, выдаліся багатымі на падзеі. Мы абралі самыя асноўныя.
«Белсат» прызналі экстрэмісцкім
Сайт і сацыяльныя сеткі «Белсату» прызналі экстрэмісцкімі. Такое рашэнне 27 ліпеня прыняў суд Чыгуначнага раёну Гомля. Падставай для гэтага сталі матэрыялы праверкі ўпраўлення ГУБАЗіК МУС па Гомельскай вобласці.
На працу нашую гэта аніяк не паўплывала – мы працягваем інфармаваць вас пра самыя актуальныя падзеі, фіксаваць тое, што адбываецца ў Беларусі.
Сустрэча з Джо Байдэнам
Святлана Ціханоўская сустрэлася з прэзідэнтам ЗША Джо Байдэнам.
«Стоячы ў Белага дому перад журналістамі, я спрабавала зразумець свае пачуцці пасля сустрэчы з прэзідэнтам Байдэнам. Але я тут не адна. За маёй спінаю – 36 тысяч беларусаў, якія прайшлі праз арышты і катаванні. 10 з іх – загінулі. Але ўсе яны казалі маім голасам на гэтай сустрэчы», – распавяла Ціханоўская пасля сустрэчы з кіраўніком ЗША.
Спроба вывазу Ціманоўскай у Беларусь
Бягуння Крысціна Ціманоўская абурылася, што яе паставілі на эстафету 4х400 метраў – гэта не ейная дыстанцыя. За гэта яе знялі з Алімпіяды і гвалтам спрабавалі вывезці ў Беларусь. У аэрапорце Токіа Ціманоўская звярнулася па дапамогу да паліцыянтаў. У выніку яна атрымала польскую візу і прыехала ў Варшаву.
Што казала Ціманоўская падчас першай прэсавай канферэнцыі, можна пачытаць тут.
Літва пачала вяртаць мігрантаў
Беларусь прывозіць з Іраку людзей і скіроўвае іх у бок літоўскай мяжы, якую яны спрабуюць нелегальна перайсці. Літва спачатку прымала мігрантаў і сяліла ў лагеры, а цяпер пачала вяртаць назад.
Дарэчы, Ірак спыніў рэйсы ў Беларусь, і цяпер самалёты іракскіх авіялініяў толькі вяртаюць грамадзянаў назад.
Затрыманні экспертаў
4 жніўня раніцай дома ў метадолага і філосафа Уладзіміра Мацкевіча прайшоў ператрус, цяпер спадар Мацкевіч на Акрэсціна. Таксама прыйшлі з ператрусам і да сацыёлага, каардынатаркі Лятучага ўніверсітэту Таццяны Вадалажскай, яе таксама змясцілі на Акрэсціна.
Сацыёлаг Аксана Шэлест і грамадскі актывіст Улад Вялічка таксама былі затрыманыя, але пазней іх адпусцілі. Мацкевіча і Вадалажскую прызналі палітычнымі вязнямі.
ВЯ belsat.eu
