Амаль паўтысячы затрыманняў. БАЖ апублікаваў статыстыку па рэпрэсіях у медыясферы
Цягам 12 месяцаў, 9 жніўня 2020 года, журналісцкая супольнасць Беларусі перажыла небывалыя рэпрэсіі.
«З дня выбараў прэзідэнта ў 2020 годзе і па жнівень 2021 года беларуская медыясфера панесла велізарныя страты: былі знішчаны або вымушаныя зачыніцца многія медыя, дзясяткі калегаў у няволі, журналісты былі асуджаныя па крымінальных артыкулах, прайшлі сотні ператрусаў, выключэнняў тэхнікі, арыштаў, ініцыяваныя крымінальныя справы супраць супрацоўнікаў медыя, рэдакцыі і журналісты шмат разоў былі пакараныя штрафамі», – адзначае Беларуская асацыяцыя журналістаў.
Статыстыка па медыясферы ў лічбах:
- Затрыманняў журналістаў за год – 497
- Фактаў гвалту і раненняў журналістаў – 68
- Адміністратыўных арыштаў журналістаў – 119
- На дадзены момант у няволі – 29 прадстаўнікоў медыяў
- Прадстаўнікоў медыяў пад крымінальным пераследам – больш за 50 чалавек
- Ператрусы і агляды ў журналістаў і ў рэдакцыях – 135
- Заблакаваны доступ да грамадска-палітычных і сайтаў медыя – больш за 100
- Выданні, вымушаныя спыніць выпуск – 10.
Нагадаем, журналісткі «Белсату» Кацярына Андрэева і Дар’я Чульцова знаходзяцца за кратамі ўжо 266 дзён. Яны былі затрыманыя 15 лістапада 2020 года за стрым з жорсткага разгону падчас акцыі памяці Рамана Бандарэнкі ды разбурэння сілавікамі народнага мемарыялу. Кацярыне і Дар’і выставілі абвінавачанне паводле ч. 1 арт. 342 («Арганізацыя і рыхтаванне дзеянняў, што груба парушаюць грамадскі парадак») Крымінальнага кодэксу. 18 лютага 2021 года суддзя Фрунзенскага раённага суда Менску Наталля Бугук пакарала Кацярыну і Дар’ю 2 гадамі пазбаўлення волі ў калоніі агульнага рэжыму.
ІІ belsat.eu
