Афіцыйны прадстаўнік Офісу Святланы Ціханоўскай у Кіеве Валер Кавалеўскі заклікаў Украіну адмяніць рашэнне ў справе беларускай валанцёркі Карыны Пацёмкінай, якую ўкраінскія ўлады вырашылі дэпартаваць з краіны.
Паводле яго, гэтая праблема ўзнятая перад кіраўніцтвам Дзяржаўнай міграцыйнай службы, МУС, Упаўнаважаным па правах чалавека Украіны і «зроблены заклік адмяніць несправядлівае рашэнне аб высылцы Карыны».
«Сумесна з беларускімі і ўкраінскімі праваабаронцамі будуць падрыхтаваныя прапановы да Вярхоўнай Рады, якія дазволяць абараніць правы беларусаў і выключыць падобныя сітуацыі ў будучым», – адзначыў Кавалеўскі.
Паводле яго, «становіцца штодзённай навіной, што беларусы ва Украіне, у тым ліку тыя, якія займаюцца валанцёрскай дзейнасцю, становяцца аб’ектамі несправядлівага ўжывання закона. Гэтыя праблемы ў беларусаў з’явіліся на фоне агрэсіі Расеі, у якую Лукашэнка ўцягнуў нашую краіну».
Сама Карына Пацёмкіна, заявіў Кавалеўскі, настроеная рашуча і будзе змагацца за адмену рашэння аб дэпартацыі.
Беларуская валанцёрка Карына Пацёмкіна мусіць пакінуць тэрыторыю Украіны да 15 ліпеня. Яна працавала валанцёркай у Бучы і мае падзяку ад Бучанскай тэрытарыяльнай грамады, але міграцыйныя службы гэтага не сталі ўлічваць.
Да гэтага ў Пацёмкінай не прынялі дакументаў, якія яна падавала для часовага віду на жыхарства ва Украіне.
Карына Пацёмкіна з’ехала з Беларусі ва Украіну ў снежні 2021 года праз пагрозу палітычнага пераследу, пасялілася ў Бучы каля Кіева. Яна працягвала жыць у Бучы, калі пачалася расейская акупацыя, пасля здолела эвакуявацца. У пачатку красавіка, адразу пасля вызвалення гораду ад расейцаў, яна вярнулася ў горад, займалася валанцёрскай дзейнасцю.
Якуб Хруст belsat.eu
