КДБ заявіў пра «шырокамаштабную зачыстку ад радыкальна настроеных». Вынікі нападу на прэсу і актывістаў
За 8 ліпеня сілавыя органы правялі маштабны напад на незалежныя выданні Беларусі. Камітэт дзяржаўнай бяспекі тым часам распавядае пра аперацыю супраць «удзельнікаў радыкальных чатаў».
Цягам 8 ліпеня ператрусы прайшлі ў наступных выданнях:
- «Наша ніва»;
- «Брестская газета»;
- «Intex-press» (Баранавічы);
- Orsha.eu;
- «Медиа-Полесье» (Пінск – Лунінец – Столін) у «справе акту тэрарызму».
Ператрусы правялі таксама ў:
- галоўнага рэдактара «Нашай нівы» Ягора Марціновіча, рэдактара Андрэя Скурка і работнікаў бухгалтэрыі;
- колішняга галоўнага рэдактара «Нашай нівы», а цяпер галоўнага рэдактара часопісаў «Наша гісторыя», «Дуду» і «Асцярожна: дзеці!» Андрэя Дынька;
- журналісткі Bobr.by Алесі Лацінскай;
- віцебскага журналіста-фрылансера Змітра Казакевіча;
- фатографа Orsha.eu Дзяніса Дубкова;
- берасцейскай актывісткі Аляксандры Гаўрусік;
- віцебскага актывіста Мікалая Качурца;
- гомельскага валанцёра Іллі Міронава;
- актывістаў з Глыбокага Аляксандра Шарабайкі і Вольгі Лапаткі;
- у Докшыцах – у настаўніка Арцёма Стадольніка і былога следчага Юрыя Мацеюна;
- шэрагу светлагорскіх актывістаў.
Рэдактара берасцейскага сайту «Першы рэгіён» Алега Супрунюка аштрафавалі на 500 рублёў за «распаўсюд экстрэмісцкіх матэрыялаў». Ператрус у віцебскага журналіста Вячаслава Лазарава не чынілі, аднак у ягонай маці забралі тэлефон.
Затрыманыя:
- У справе аб масавых беспарадках – Ягор Марціновіч, Андрэй Скурко, Андрэй Дынько і галоўная бухгалтарка «Нашай нівы» Вольга Раковіч. Яны цяпер у ізалятары на Акрэсціна, затрыманыя на 72 гадзіны.
- У справе аб псаванні будынкаў надпісамі палітычнага характару – рэдактар аршанскага сайту Orsha.eu Ігар Казмерчак.
- У справе аб абразе прадстаўніка ўлады дапыталі ў Следчым камітэце і затрымалі журналіста-фрылансера Віталя Скрыля з Віцебску.
- З невядомай прычыны (магчыма, у справе аб абразе прадстаўніка ўлады) – глыбоцкі журналіст Зміцер Лупач, па яго прыехалі ў санаторый.
- З невядомай прычыны, «звязанай з тэрарызмам», – гомельскі палітык і грамадскі дзеяч Васіль Палякоў.
- З невядомай прычыны ў Докшыцах – настаўнік Арцём Стадольнік і былы следчы Юрый Мацеюн.
- Магчыма, гомельскі валанцёр Ілля Міронаў.
- Паводле інфармацыі чытачоў «Белсату», у Докшыцах засталіся пад вартаю на 72 гадзіны ў межах крымінальнай справы тры асобы: Юрый Мацеюн, Арцём Стадольнік і маці траіх дзяцей, актывістка Вераніка Судніковіч. Усім траім інкрымінуюць арт. 341 быццам за размаляваны аўтобусны прыпынак у вёсцы Замасточча Докшыцкага раёну.
- Іншыя.
Журналістак «Нашай нівы» Наталлю Лубнеўскую і Шуру Піліповіч-Сушчыц адпусцілі пад падпіску пра неразгалашэнне.
Паводле тэлеграм-каналу «Страна для жизни», у менскім жылым комплексе «Каскад» увечары 8 ліпеня ў межах «зачысткі» затрымалі яшчэ трох чалавек.
Заблакаваныя сайты:
- «Нашай нівы» – Nn.by (застаецца недаступны і праз VPN);
- новы сайт былых работнікаў заблакаванага TUT.by – Zerkalo.io;
- сайт-люстэрка «Еўрарадыё» – Euroradio.pl.
КДБ: Трывае «шырокамаштабная аперацыя для зачысткі ад радыкальна настроеных»
Пра гэта ў эфіры дзяржаўнага тэлеканалу «Беларусь 1» заявіў намеснік начальніка следчага ўпраўлення КДБ Канстанцін Бычак. Над гэтым «працуе ўвесь сілавы блок краіны», кажа ён, і былі выяўленыя ўдзельнікі чатаў «ОГСБ», «ОГС» і «Буслы летят».
Ці тая гэта аперацыя, пра заканчэнне якой 2 ліпеня абвясціў Аляксандр Лукашэнка, і ці звязаная яна з нападам на прэсу, невядома.
АА belsat.eu
