Марына Шканава выйшла сёння на старт, і паказала свой найлепшы вынік. Праўда, гэта вельмі далёка ад медалёў. Шканава стала 20-й у слаламе.
Менавіта такую задачу – быць 20-й, паставіла Шканавай беларускае Міністэрства спорту.
Пасля фінішу спартоўка сказала TEAM BY:
– Свой выступ ацэньваю добра, выдатна! Паказала свой найлепшы вынік. Вядома, хвалявалася перад сённяшнім днём, ды і ўсе дні, якія мы трэнаваліся. Тут спецыфічны снег, вельмі своеасаблівы, і складана да яго прызвычаіцца. Але, відаць, я да яго прыстасавалася, таму задаволеная сваім выступам. Хачу падзякаваць свайму трэнеру, бацькам, сябрам… Дзякуй вялікі за падтрымку, і прывітанне ўсёй Беларусі!
7 лютага падпісантка праўладнага ліста на Алімпіядзе ў Пекіне не выйшла на старт.
Гарналыжніца Марыя Шканава пераехала ў Беларусь у 2008 годзе, і адразу атрымала грамадзянства. З таго часу Шканава з’ездзіла на чатыры Алімпіяды, і цяпер паказала свой найлепшы вынік – 20-е месца сярод 36 удзельніц. Здаецца, што для 32-гадовай спартоўкі гэта Алімпіяда стала апошняй.
АЛ/МГ belsat.eu