9 лютага сілавікі прыйшлі ў офіс IT-кампаніі «Godel Technologies» у Горадні.
Знаёмыя працаўнікоў кампаніі паведамілі «Белсату», што іх папрасілі ператэлефанаваць праз гадзіну. А на фоне былі чуваць мужчынскія галасы.
У «Godel Technologies» пацвердзілі карэспандэнту belsat.eu прыход сілавікоў у гарадзенскі офіс.
«Пацвярджаем. Візіт з дзейнасцю кампаніі не звязаны. Сітуацыя пад кантролем. Ад далейшых каментароў устрымаемся», – паведаміла піяр-менеджарка кампаніі Віталіна.
Як паведамляе Hrodna.life, у офіс «Godel Technologies» прыйшлі супрацоўнікі Кастрычніцкага РАУС Горадні. Яны хацелі агледзець працоўнае месца аднаго з супрацоўнікаў кампаніі Ягора Сачко ў рамках адміністрацыйнай справы. Самога супрацоўніка на месцы не было, бо ён працуе выдалена.
Супрацоўнік «Godel Technologies» Уладзімір Родчанка прасіў міліцыянтаў прадставіцца, а таксама тэлефанаваў адвакату і ўдакладняў, ці маюць яны права пранікаць у офіс без дакументаў. Яго затрымалі за непадпарадкаванне супрацоўнікам органаў унутраных спраў (арт. 23.4 КаАП).
12 жніўня 2020 года Уладзімір разам з трыма знаёмымі ўстаў на калені насупраць Гарадзенскага аблвыканкаму з фота пяцігадовай дзяўчынкі, пацярпелай увечары напярэдадні. Іх затрымалі, збілі ў РАУС і размалявалі твар маркерам. Увечары 12 жніўня Уладзімір трапіў у больніцу хуткай медычнай дапамогі. Пазней яго неаднаразова судзілі паводле арт. 23.34 КаАП.
МГ belsat.eu