Тралейбус рэзка затармазіў, каб пазбегнуць сутыкнення з легкавіком: 84-гадовы пасажыр тралейбуса ўпаў і памёр ад атрыманай траўмы, піша Следчы камітэт.
Паводле следства, дарожнае здарэнне адбылася ранкам 8 лістапада на вуліцы Кунцаўшчына ў Менску. 26-гадовы кіроўца легкавіка «Volkswagen» пры павароце ў двор не саступіў дарогі тралейбусу, а кіроўца тралейбуса была вымушаная рэзка затармазіць, каб унікнуць сутыкнення.
Ад экстранага тармажэння 84-гадовы пасажыр тралейбуса ўпаў, ад атрыманай траўмы памёр. Паводле папярэдніх звестак, іншыя пасажыры не пацярпелі.
Следча-аператыўная група, судмедэксперты і Дзяржаўная аўтаінспекцыя працуюць на месцы здарэння, следчае ўпраўленне па Менску мае ладзіць правяранне. Як будуць кваліфікаваныя дзеянні кіроўцаў, невядома.
Алесь Наваборскі belsat.eu