Чаго Лукашэнка дамагаецца міграцыйным крызісам? Разважае беларускі вайсковы эксперт
Наўрад ці Польшчу атрымаецца вымусіць адкрыць агонь, але гэта і не з’яўляецца галоўнай мэтай.
Раніцай 8 лістапада больш за тысячу мігрантаў пад кантролем беларускіх сілавікоў падышлі да польскай мяжы. Мігранты кіраваліся да пункту пропуску «Брузгі», але сілавікі іх не прапусцілі – павялі ў лес, дзе мігранты падышлі да плота на мяжы і сталі спрабаваць той плот зламаць. Па польскі бок дзяжураць сотні памежнікаў і вайскоўцаў.
У чым сэнс гэтага «паходу» і чаго хоча дамагчыся міграцыйным крызісам Аляксандр Лукашэнка, якога на Захадзе неаднаразова называлі адказным за крызіс? «Белсат» спытаў вайсковага эксперта Аляксандра Алесіна.
Да страляніны не маюць даводзіць
На думку Алесіна, Лукашэнка не стане правакаваць палякаў на страляніну, бо гэта пагражае вельмі сур’ёзнымі наступствамі. І сама Польшча наўрад ці захоча страляць: у яе і без таго напружаныя стасункі з Еўразвязам – паводле Алесіна, да Польшчы ставяцца як да «непаслухмянага дзіцяці».
«Я думаю, што Лукашэнка гэтым хоча, каб Польшча данесла да Захаду ягоны мэсэдж, што ён усё ж хоча аднаўлення кантактаў, хоча вымусіць Захад размаўляць з ім як з роўным партнёрам, што ў яго руках важны інструмент, каб адрэгуляваць ці спыніць гэты рух мігрантаў, – разважае Алесін. – Галоўная ягоная мэта – вымусіць Польшчу данесці мэсэдж Захаду, што без папярэдніх умоваў яны мусяць выйсці на кантакт з Лукашэнкам».
Алесін мяркуе, што не патрэбныя нават грошы – перадусім Лукашэнку важна наладзіць кантакт з Захадам, калі яго настолькі занесла на Усход. І гэткую палітыку Лукашэнка будзе працягваць, пакуль не атрымае змякчэнне стаўлення – магчыма нават, закулісных перамоваў не толькі аб мігрантах, а аб «легалізацыі» Лукашэнкі і прызнання яго лідарам Беларусі.
Пагроза не толькі ў мігрантах, а і ў Расеі
Алесін разважае: Захад мо і хацеў бы «адыграць назад», бо «загналі Лукашэнку ў лапы Пуціна», і нават калі не вярнуць стан да перадвыбарчага, то праводзіць палітыку, якая б спыняла далейшае скатванне Лукашэнкі на Усход.
Далейшая вайсковая супраца Лукашэнкі з Крамлём можа прывесці да размяшчэння ў Беларусі расейскага вайсковага кантынгенту, значнага ўзмацнення рэгіянальнай групоўкі сухапутных сілаў, пра што Лукашэнка ўжо згадваў. Можа быць як узмацненне беларускага войска новай зброяй, так і стварэння нечага падобнага да вайсковых базаў у статусе «навучальных цэнтраў», або павелічэнне частаты вучэнняў да ўжо амаль пастаяннай «ратацыйнай» асновы.
Такая тактыка гучыць сумнеўна – ці праўда яна можа спрацаваць у XXI стагоддзі?
Такое развіццё падзеяў, лічыць Алесін, не падабаецца Захаду – не хочуць, каб Лукашэнка цалкам трапіў пад абсалютны ўплыў Расеі. Ды эксперт лічыць, што «ўжо пазнавата», а Захад не мае такіх аргументаў, якія маглі б зацікавіць Лукашэнку, а калі і ёсць, Захад не гатовы скарыстаць іх.
«Я думаю, стаўкі падвышаюцца, – рэзюмуе Алесін. – На жаль, гульня ў нейкі момант можа выйсці з-пад кантролю з абодвух бакоў. Вось небяспека: калі падзеі прымуць некіраваны характар і будуць развівацца паводле сваёй логікі. Вось тады можна рыхтавацца да найгоршага сцэнару».
АА belsat.eu
