Святлана Ціханоўская плануе ўзяць удзел у Генеральнай асамблеі ААН, 77-я сесія якой адкрыецца ў Нью-Ёрку 13 верасня. Там у яе адбудуцца сустрэчы з сусветнымі лідарамі.
«Не хачу забягаць наперад, але некаторыя вельмі важныя сустрэчы з сусветнымі лідарамі ўжо запланаваны. Аж да таго, што вызначаны іх дата, час і месца», – паведаміў BPN яе дарадца Аляксандр Шлык.
Паводле яго, удзельнікі Генасамблеі «ўбачаць прадстаўніка беларускага грамадства, а не нелегітымнага рэжыму».
Таксама 8 верасня стала вядома, што Рада Еўропы вырашыла стварыць Кантактную групу для супрацы з беларускім грамадствам. Такім чынам, арганізацыя падтрымала прапанову Святланы Ціханоўскай, агучаную на сустрэчах з генеральным сакратаром Рады Еўропы і выступлення перад ПАРЕ.
Кантактная група будзе дапамагаць Радзе Еўропы выпрацоўваць пазіцыі адносна Беларусі. Таксама яна зможа каардынаваць і рэалізоўваць праекты ў межах розных праграмаў Рады Еўропы, рыхтаваць праекты рэформаў і дэмакратычных пераўтварэнняў для новай Беларусі.
У кантактную групу ўвойдуць прадстаўнікі структур Рады Еўропы, грамадзянскай супольнасці і дэмакратычных сілаў.
Якуб Хруст belsat.eu