Кіроўца аўтобусу, які перакуліўся 6 верасня каля польскай вёскі Пётравіна, 8 верасня быў вызвалены з паліцыі. Пра гэта паведаміла «Белсату» Эльжбета Загурска з Павятовай управы паліцыі ў Міньску Мазавецкім.
Паводле яе, кіроўца прызнаў сваю віну і быў адпушчаны на волю.
«Пакараны штрафам і пазбаўленнем волі з адтэрміноўкай», – паведаміла Эльжбета Загурска.
Аварыя з аўтобусам здарылася за 70 кіламетраў ад Варшавы, паміж гарадамі Міньск-Мазавецкі і Седльцэ. Аўтобус, у якім ехалі беларусы, з’ехаў у роў, зачапіў дрэва і перакуліўся.
У аўтобусе былі 45 пасажыраў і два кіроўцы. Пасля здарэння ў шпіталь трапілі 39 пацярпелых без цяжкіх пашкоджанняў.
Станам на 7 верасня ў шпіталі пад наглядам медыкаў працягвалі знаходзіцца менш як 10 асобаў.
Якуб Хруст belsat.eu