Што пішуць у лістах пра суд Сяргей Ціханоўскі і іншыя ўдзельнікі закрытага працэсу, іхныя блізкія распавялі БелаПАН.
Паводле жонкі Ігара Лосіка Дар’і, муж у лістах называе суд «смехапанарамай» і распавядае, што ходзіць на паседжанні ў масцы, каб схаваць усмешку.
«Бярэ слова «суд» у двукоссе, бо гэта судзілішча», – кажа Дар’я.
Сяргей Ціханоўскі піша з СІЗА, што суд працягнецца, магчыма, да лістапада, а на Новы год блогер, магчыма, ужо не будзе ў Гомлі.
Аператар Арцём Сакаў піша: «Калі я такі «злачынца», то няхай даюць найвышэйшую меру пакарання. Мяркуючы з таго, як праходзяць будні, разумееш, што табе паказваюць усебаковую зацікаўленасць у адтэрміноўцы».
Мікола Статкевіч не наведвае паседжанняў: ён сам запатрабаваў гэтага, а потым быў выдалены да спрэчак бакоў.
Суд над Сяргеем Ціханоўскім, Ігарам Лосікам, Уладзімірам Цыгановічам, Міколам Статкевічам, Арцёмам Сакавым, Змітром Паповым распачаўся 24 чэрвеня ў Гомельскім СІЗА № 3. Паседжанні праходзяць у закрытым рэжыме.
ГГ, belsat.eu