«Белсат» падводзіць вынікі 8 верасня – 394 дня паслявыбарчага пратэсту ў Беларусі, Дня вайсковай славы і Міжнароднага дня салідарнасці журналістаў.
Беларусь і Расея рыхтуюцца да сустрэчы Аляксандра Лукашэнкі і Уладзіміра Пуціна, запланаванай на 9 верасня ў Маскве. Расейскае РБК піша, што Беларусь пачала перамовы пра крэдыт у $3 млрд ад Еўразійскага стабфонду.
Тым часам у польскім Карпачы мінуў трэці дзень Эканамічнага форуму, які быў прысвечаны беларускаму пытанню. У мінулы дзень форуму Святлана Ціханоўская дамовілася з мэрам Львова аб адкрыцці медыяхабу для беларускіх журналістаў. Сёння ж былі чатыры панэлі, прысвечаныя санкцыям, эканамічным рэформам, цяперашнім падзеям у Беларусі, а таксама беларускім дэмакратычным структурам.
Сярод іншых на тым форуме прысутнічае колішні палітвязень, а цяпер пралукашэнкаўскі палітолаг Юрый Васкрасенскі, які, прыехаўшы ў Польшчу, фармальна застаецца пад хатнім арыштам у Беларусі. Польшча сцвярджае, што не давала візы Васкрасенскаму.
Дысцыплінарная камісія Міжнароднай федэрацыя хакею на лёдзе (IIHF) вырашыла дыскваліфікаваць са спартовай дзейнасці старшыню Федэрацыі хакею Рэспублікі Беларусь (ФХРБ) Дзмітрыя Баскава. Адхіленне Баскава звязанае як з ціскам на спартоўцаў, так і з падазрэннем у тым, што ён датычны да забойства Рамана Бандарэнкі. Калі Баскава не здымуць з пасады старшыні ФХРБ, санкцыі пагражаюць ужо самой федэрацыі. Але ФХРБ здымаць Баскава не хоча.
Тым часам Генеральная пракуратура Беларусі ў чэрвені гэтага года накіроўвала ў Латвію запыт аб прававой дапамозе ва «ўстанаўленні фактаў удзелу нацыстаў і іхных саўдзельнікаў з ліку сябраў Латышскіх легіёнаў СС у знішчэнні насельніцтва БССР. Латвія адмовіла.
У Беларусі не спыняюцца палітычныя рэпрэсіі, суды, затрыманні і ператрусы. «Атрады грамадзянскай самаабароны Беларусі» афіцыйна ўнеслі ў тэрарыстычны спіс КДБ. У праваабаронцы з Пінску Веранікі Івановай адбыўся ператрус.
Менчука Віталя Каваленку асудзілі на тры гады «хатняй хіміі». «Людзі ў цывільным» ламіліся ў кватэру, адзін зламаў пальцы, вінаваты – гаспадар кватэры. Чаму ламіліся, на судзе так і не стала вядома.
Аршанцу Андрэю Астрацову прысудзілі 5 гадоў калоніі ўзмоцненага рэжыму за «заклікі да дзеянняў, скіраваных на прычыненне шкоды нацыянальнай бяспецы», якія ён пісаў у Telegram-чаце пасля падзеяў 9–12 жніўня 2020 года, калі сілавікі закідалі аўтамабіль ягонага сына святлошумавымі гранатамі.
Экс-журналіста «Трыбуны» Андрэя Маслоўскага асудзілі на 15 содняў за «экстрэмісцкія матэрыялы». Якія менавіта, невядома, але раней «экстрэмісцкай» прызналі ўсю «Трыбуну».
Але пад пераслед трапіў і віцебскі чыноўнік Ілля Смунеў, вядомы песняй «Куды бацька, туды я», і шукаюць яго як мінімум у Расеі ў межах нейкай крымінальнай справы.
Урад Беларусі падняў квоты на вытворчасць пладова-ягаднага віна, вінаграднага ж віна будуць вырабляць менш. Квоты паднялі таксама на вытворчасць каньяку і моцных спіртовых напояў.
А з афіцыйнай статыстыкай банкрутаў нейкі парадокс: колькасць працэдураў ліквідацыі прадпрыемстваў расце, а справаў аб банкрутах – змяншаецца.
Еўрапейскі суд правоў чалавека забараніў Літве выдвараць у Беларусь пяць афганцаў. Справа ў тым, што Беларусь іх адмаўляецца прымаць назад і не падпісала адзін важны дакумент – Еўрапейскую канвенцыю абароны правоў чалавека. А яны ўжо трапілі на тэрыторыю Літвы.
Раней праз тую канвенцыю і адмову Беларусі прымаць мігрантаў, якія трапілі на яе тэрыторыю, той жа суд абавязаў Латвію і Польшчу даваць ежу, пітво, адзенне і медычную дапамогу мігрантам на беларускім памежжы.
АА belsat.eu
