«У Лукашэнкі няма легітымнасці». Бурэль паабяцаў не забываць пра ахвяраў і злачынствы Лукашэнкі
У Аляксандра Лукашэнкі няма дэмакратычнай легітымнасці. Пра гэта заявіў вярхоўны прадстаўнік Еўразвязу ў вонкавых справах і палітыцы бяспекі Жузэп Бурэль з нагоды другой гадавіны выбараў 2020 года ў Беларусі.
«Мы зноў заяўляем пра нашае цвёрдае падтрыманне іх [беларусаў. – Рэд. Belsat.eu] дэмакратычных памкненняў і намаганняў у абароне асноўных правоў чалавека. Мы паўтараем, што ў Аляксандра Лукашэнкі няма ніякай дэмакратычнай легітымнасці», – гаворыцца ў заяве.
Паводле яе, рэжым пачаў масавыя рэпрэсіі супраць беларускага народу за імкненне да дэмакратыі. З 2020 года рэпрэсіі толькі ўзмацняліся, але ніхто з вінаватых у гвалце супраць грамадзянаў не быў прыцягнуты да адказнасці. У сувязі з гэтым Бурэль паабяцаў падтрымліваць намаганні для прыцягнення рэжыму да адказнасці.
«Мы не забудзем ахвяраў рэжыму Лукашэнкі, ягоных мінулых і дзейных злачынстваў», – сказаў ён.
Бурэль таксама назваў Лукашэнку саўдзельнікам расейскай агрэсіі супраць Украіны, у тым ліку супраць волі большасці беларускага народу. У выніку рэжым пераследуе беларусаў за тое, што яны выступаюць супраць вайны.
Вярхоўны прадстаўнік Еўразвязу ў вонкавых справах і палітыцы бяспекі таксама заклікаў улады Беларусі да вызвалення палітвязняў, павагі да правоў чалавека, дыялогу, што «вядзе да вольных і справядлівых выбараў пад міжнародным назіраннем і ў адпаведнасці з міжнароднымі стандартамі».
«Мы гатовы мабілізаваць наш усёабдымны план эканамічнага падтрымання ў 3 млрд еўраў, як толькі ў Беларусі адбудзецца пераход да дэмакратыі», – гаворыцца ў заяве.
Якуб Хруст belsat.eu
