Сілавікі затрымалі журналістаў Змітра Лупача і Віталя Скрыля, якія супрацоўнічаюць з «Белсатам». У рэгіёнах у кватэрах карэспандэнтаў розных незалежных медыяў ператрусы.
Сілавікі ў Віцебску зладзілі ператрус у кватэры фрылансера Змітра Казакевіча. Ператрус праводзілі на падставе крымінальнай справы за паклёп. Верагодна, што паклёп датычыцца працаўніка міліцыі з Лепеля па прозвішчы Міхно.
Па выніках ператрусу, што цягнуўся амаль тры гадзіны, забралі ноўтбукі жонкі і дачкі Казакевіча, два старыя сістэмныя блокі, два фотаапараты і маленькі БЧБ-сцяжок.
Таксама ў Віцебску затрымалі Віталя Скрыля. Вядома, што ён падазраваны паводле арт. 369 КК («Абраза прадстаўніка ўлады»).
Схапілі і журналіста Змітра Лупача. Ён быў у санаторыі «Пліса». Перад гэтым сілавікі прыязджалі да яго дадому. Месцазнаходжанне Лупача пакуль невядомае.
У Берасці суд прысудзіў штраф у памеры 20 базавых велічыняў (580 рублёў) за нібыта распаўсюд «экстрэмісцкіх матэрыялаў» рэдактару парталу «Першы Рэгіён» Алегу Супрунюку.
Яго абвінавацілі ў тым, што ён пад публікацыяй пра Уладзіміра Гундара паставіў яго фота, на якой вязень быў у вышыванцы. «Эксперты пабачылі » на нацыянальным арнаменце свастыку.
У Бабруйску сілавікі зладзілі ператрус у журналісткі Алесі Лацінскай. Пасля ператрусу яе павезлі на размову ў КДБ.
СК belsat.eu