Упершыню з пачатку вайны ва Украіне запрацавалі радыяцыйныя дэтэктары ў Чарнобылі. Узроўні радыяцыі адпавядаюць нормам. Пра гэта паведаміў 7 чэрвеня генеральны дырэктар Міжнароднага агенцтва атамнай энергіі (МАГАТЭ) Рафаэль Гросі.
«Дзясяткі дэтэктараў радыяцыі зноў перадаюць звесткі з раёну вакол Чарнобыльскай АЭС пасля таго, як Украіна пры тэхнічнай падтрымцы МАГАТЭ аднавіла жыццёва важны інфармацыйны канал, перапынены на пачатку канфлікту», – напісаў Рафаэль Гросі ў Twitter.
Паводле Гросі, большасць з 39 дэтэктараў, якія адпраўляюць звесткі, ужо бачныя ў Міжнароднай інфармацыйнай сістэме радыяцыйнага маніторынгу МАГАТЭ.
«Атрыманыя да гэтага часу вымярэнні паказваюць, што ўзроўні радыяцыі адпавядаюць тым, якія былі атрыманыя да канфлікту. Віншуем Украіну», – напісаў гендырэктара МАГАТЭ.
У агенцтве адзначаюць, што сетка радыяцыйнага кантролю ў гэтым раёне перастала функцыянаваць 24 лютага, у першы дзень вайны, калі расейскія войскі акупавалі Чарнобыльскую АЭС і ўтрымлівалі яе цягам пяці тыдняў. Расейцы пакінулі ЧАЭС і горад Славуціч 31 сакавіка.
ЗК belsat.eu