Прадстаўнік Беларускай гандлёва-прамысловай палаты ў Аўстраліі падаў у адстаўку, бо не хоча быць прадстаўніком Лукашэнкі

Ўорэн Рэйналдс і Уладзімір Астапенка. Фота: чытачы Белсату

8 чэрвеня прадстаўнік Беларускай гандлёва-прамысловай палаты ў Аўстраліі Ўорэн Рэйналдс падаў заяву аб адстаўцы на імя старшыні БелГПП Уладзіміра Улаховіча.

Падставай для свайго рашэння Ўорэн Рэйналдс называе немагчымасць «мірыцца з беззаконнымі і злачыннымі дзеяннямі рэжыму Лукашэнкі». Ён заяўляе, што не бачыць «больш магчымым быць прадстаўніком якога-небудзь афіцыйнага органу ўраду Лукашэнкі, ці падтрымліваць яго, ці асацыявацца з ім». Копіі гэтага ліста ёсць у рэдакцыі belsat.eu.

У 2012–2018 гадах Ўорэн Рэйналдс быў ганаровым консулам Рэспублікі Беларусь у Аўстраліі, а з 2011 года – прадстаўніком БелГПП на паўднёвым кантыненце. Пры ім былі адкрытыя прадстаўніцтва БелАЗу ў штаце Новы Паўднёвы Ўэльс і дыстрыбутарскі цэнтр МТЗ у Заходняй Аўстраліі.

Прадстаўнік Народнага антыкрызіснага ўпраўлення Уладзімір Астапенка звязаўся з Рэйналдсам неўзабаве пасля заявы і падтрымаў ягонае рашэнне ад імя руху беларускіх дэмакратычных сілаў.

Літва застанецца без амбасадара ў Беларусі, бо не прызнае Лукашэнку прэзідэнтам

Нагадаем, што амбасадар Літвы ў Беларусі Андрус Пулокас будзе вызвалены ад сваёй пасады 5 жніўня. Паколькі Літва не прызнае Аляксандра Лукашэнку законна абраным прэзідэнтам, новапрызначаны амбасадар не зможа ўручыць яму даверчых граматаў.

У сваю чаргу Славенія 4 ліпеня афіцыйна адклікала згоду на працу беларускага ганаровага консульства ў Любляне пад кіраўніцтвам Янеза Шкрабца. Апошні быў ганаровым консулам у Славеніі з 2014 года.

А Італія ўжо некалькі месяцаў не выдае дазволу на прызначэнне амбасадарам Беларусі Анатоля Глаза.

Славенія адклікала дазвол на беларускае консульства, Італія не дала згоду прыняць новага амбасадара

МГ belsat.eu

Hавiны