Лідары краін «Вялікай сямёркі» абавязаліся ўзмацніць ціск на Расею, у прыватнасці – адмовіўшыся ад расейскіх нафты і газу. Пра гэта гаворыцца ў іх заяве, апублікаванай на сайце Белага дому па выніках віртуальнай сустрэчы з прэзідэнтам Уладзімірам Зяленскім 8 траўня.
Паводле заявы, праз 77 гадоў пасля Другой сусветнай вайны рэжым прэзідэнта Расеі Уладзіміра Пуціна ўварваўся ва Украіну, чым парушыў «заснаваны на правілах міжнародны парадак, у прыватнасці статут ААН, задуманы пасля Другой сусветнай вайны, каб пазбавіць наступныя пакаленні ад бедстваў вайны».
У G7 падкрэслілі поўную салідарнасць і падтрымку мужнай абароны Украінай свайго суверэнітэту і тэрытарыяльнай цэласнасці і яе барацьбы за мірную, квітнеючую і дэмакратычную будучыню.
Лідары краін G7 паабяцалі працягваць ваенную і абаронную дапамогу Узброеным сілам Украіны, пашыраць супрацу, у тым ліку ў пытаннях інфармацыйнай бяспекі, і падтрымліваць Украіну ў павышэнні яе эканамічнай і энергетычнай бяспекі.
Эканоміка: падтрыманне Украіны і санкцыі супраць Расеі
Краіны «Вялікай сямёркі» ў найбліжэйшыя тыдні абяцаюць узмацніць кароткатэрміновую фінансавую падтрымку Украіны, што дапаможа ліквідаваць фінансавыя разрывы і надаваць базавыя паслугі насельніцтву. Таксама яны плануюць распрацаваць варыянты доўгатэрміновай падтрымкі дзеля аднаўлення краіны і рэканструкцыі разбураных аб’ектаў інфраструктуры.
Як адзначаецца, з пачатку вайны G7 разам з міжнароднай супольнасцю ўжо вылучылі Украіне і паабяцалі дадатковую падтрымку на больш як 24 млрд долараў.
Таксама краіны «Вялікай сямёркі» будуць працягваць уводзіць за вайну сурʼёзныя і неадкладныя эканамічныя санкцыі супраць Расеі і Пуціна. У прыватнасці, плануецца «ўпарадкавана» зменшыць залежнасць ад расейскіх энергарэсурсаў, у тым ліку шляхам паступовага спынення або забароны імпарту расейскай нафты.
«Мы будзем прымаць захады, каб забараніць ці іншым чынам не дапусціць надання ключавых паслуг, ад якіх залежыць Расея», – гаворыцца ў заяве.
Апроч таго, плануецца ўзмацняць санкцыі супраць расейскіх банкаў, якія зʼяўляюцца сістэмна крытычнымі для фінансавай сістэмы РФ і якія звязаныя з сусветнай эканомікай. Будуць уводзіцца дадатковыя санкцыі супраць расейскіх фінансавых эліт і іх сваякоў, якія падтрымліваюць Пуціна ў ягоных ваенных дзеяннях.
Таксама працягнецца барацьба са спробамі расейскага рэжыму распаўсюджваць сваю прапаганду і дэзынфармацыю.
Уплыў вайны на свет
Лідары G7 адзначылі, што вайна РФ супраць Украіны прыводзіць да глабальных эканамічных праблемаў. У прыватнасці, негатыўна ўплывае на глабальныя пастаўкі энергарэсурсаў, угнаенняў і харчавання ды на функцыянаванне глабальнай лагістыкі ў цэлым.
Кіраўнікі краіны «Вялікай сямёркі» заклікалі Расею «спыніць блакаду і любую іншую дзейнасць, якая яшчэ больш перашкаджае ўкраінскай вытворчасці і экспарту харчовых прадуктаў, у адпаведнасці з яе міжнароднымі абавязкамі».
«Невыкананне гэтага будзе расцэненае як напад на харчовую бяспеку свету», – гаворыцца ў заяве.
Лідары G7 абяцаюць актывізаваць намаганні, каб дапамагчы Украіне захаваць вытворчасць харчавання і экспартаваць аграрную прадукцыю, у тым ліку альтэрнатыўнымі маршрутамі.
ПС belsat.eu
