За дзве БЧБ-налепкі ў ліфце 54-гадовую Юлію Грыневіч аштрафавалі на 1160 рублёў, паведамляе ПЦ «Вясна».
У Ждановіцкім РАУСе на жанчыну склалі адразу два пратаколы па арт. 24.23 КаАП за пікетаванне ў ліфце яе дома. Згодна з пратокаламі «21 і 22 красавіка каля 8:00 у ліфце дома ў Ждановічах Грыневіч размясціла дзве БЧБ-налепкі, тым самым правяла адзіночны пікет».
Пад час паседжання суддзя Кропачаў цікавіўся, з якой мэтай яна размяшчала налепкі і ці звязана гэта з сітуацыяй у краіне. У матэрыялах справы таксама былі фотаздымкі з камер відэаназірання ў ліфце, на якіх бачна Юлію.
Суду Юлія паведаміла, што даглядае маці і мае афіцыйнае пацверджанне.
Суд па справе адбыўся за 7 хвілін: суддзя Менскага раёну Кропачаў змог азнаёміцца з матэрыяламі справы, выслухаць Юлію і прыняць рашэнне. Вынік – 40 базавых (1160 рублёў).
АД, belsat.eu
