Позна ўвечары 7 сакавіка расейскія войскі абстралялі ўкраінскія гарады Ахтырка, Сумы, а таксама Сумскі раён. У выніку пападання бомбы ў жылы раён загінулі людзі, паведамляе Дзяржаўная служба надзвычайных сітуацыяў Украіны.
Ратавальнікі выехалі на месца здарэння пасля 23:00. Зліквідаваўшы пажар, яны здолелі разблакаваць жанчыну з траўмамі, яе перадалі медыкам. Таксама з-пад завалаў дасталі целы дзевяці загінулых, з іх двое – дзеці.
Раніцай 8 сакавіка дарадца міністра ўнутраных справаў Украіны Антон Герашчанка ўдакладніў, што ў Сумах загінулі 18 мірных жыхароў. Разбор завалаў яшчэ працягваецца.
Паводле ўпраўлення вярхоўнага камісару ААН у правах чалавека на дзень 7 сакавіка падчас расейскага ўварвання ва Украіне загінулі больш за 400 мірных жыхароў, з іх 27 – дзеці.
ГГ, belsat.eu