«Народ яшчэ не зразумеў, што здарылася». Эксперт спрагназаваў сітуацыю на беларускім рынку жытла
З пачаткам вайны Расеі супраць Украіны пры актыўным удзеле рэжыму Аляксандра Лукашэнкі і на фоне ўведзеных за гэта санкцыяў рынак жытла ў Менску трошкі прасеў. Але не так моцна, як можна было чакаць. Паразмаўлялі з экспертам пра перспектывы.
Паводле звестак Realt.by, сярэдні кошт квадратнага метра жытла ў Менску за тыдзень з 20 да 27 лютага знізіўся на 8 долараў – з 1272 да 1264. І дагэтуль застаецца на тым самым узроўні.
Пры гэтым на пачатку года квадратны метр каштаваў яшчэ менш – 1229 долараў. То бок нават нягледзячы на вайну, новыя санкцыі ды рэзкі рост курсу долара жытло ў Беларусі каштуе даражэй, чым яшчэ два месяцы таму.
У каментары «Белсату» эксперт на рынку нерухомасці на ўмовах ананімнасці патлумачыў сітуацыю і зрабіў прагноз на далейшае развіццё.
«Народ яшчэ не зразумеў, што здарылася. Убачыў толькі рост курсу долара і цяжкасці з атрыманнем наяўнай валюты ў банках. Да траўня дойдзе да ўсіх. Да гэтага ўгодаў будзе вельмі мала. Жытло будуць купляць у тых, хто сур’ёзна скінуў кошт», – мяркуе суразмоўца.
У траўні ж, на ягоную думку, «зніжка 10–15 % ад кошту пачатку года ўжо не будзе ўспрымацца як зніжка ўвогуле». Такім чынам, рэальны кошт квадратнага метра можа ўпасці да 1050–1100 долараў.
ПС belsat.eu
