«Белсат» падводзіць вынікі аўторка, 8 лютага, і распавядае пра галоўныя падзеі дня.
Рэакцыя суседніх дзяржаў на «Саюзную рашучасць-2022»
Узброеныя сілы Літвы падвысілі ўзровень боегатоўнасці з-за вучэнняў, якія Расея праводзіць разам з беларускай арміяй на тэрыторыі нашай краіны. Пра гэта распавёў у інтэрв’ю BNS галоўнакамандуючы літоўскай арміі Вальдэмарас Рупшыс.
Канцэнтрацыя расейскіх вайскоўцаў і ваеннай тэхнікі ля мяжы з Украінай, а таксама вучэнні «Саюзная рашучасць-2022» у Беларусі выклікаюць занепакоенасць Захаду адносна бяспекі ў Цэнтральнай і Ўсходняй Еўропе. Гэта стала прычынай падвышэння боегатоўнасці літоўскай арміі.
Украінская армія 10–20 лютага правядзе ўласныя вучэнні ў розных рэгіёнах краіны для падрыхтоўкі да магчымай знешняй агрэсіі, паведамляе «Украінская праўда».
Вучэнні пройдуць паралельна з беларуска-расійскімі вучэннямі «Саюзная рашучасць». Пра гэта заявіў міністр абароны краіны Аляксей Рэзнікаў. Ён падкрэсліў, што ўздоўж усіх межаў Украіны з боку Расеі, Беларусі і тэрыторый Данбаса знаходзіцца 119 тыс. ваенных наземнага кампанента войскаў, з паветраным і марскім кампанентамі – 140 тыс.
Вучэнні ва Украіне адбудуцца, хаця прэс-сакратар Крамля Дзмітрый Пяскоў, пасля перагавораў прэзідэнтаў Расеі і Францыі, запэўніў, што пры сканчэнні вучэнняў «Саюзная рашучасць» расейскія войскі будуць выведзены з Беларусі.
Пяты дзень галадоўкі
Палітвязень філосаф Уладзімір Мацкевіч ужо пяць дзён галадае ў беларускай турме. Адвакат зняволенага распавёў, што пасля чатырох дзён галадоўкі філосаф «у цэлым адчувае сябе здавальняюча» і знаходзіцца «ў роўным настроі», так як падрыхтаваў сябе і маральна і фізічна да гэтага выпрабавання. Адміністрацыя СІЗА адносіцца да факту галадоўкі карэктна і ў рамках стандартных нормаў і працэдур: зафіксавала факт галадоўкі, Уладзіміра наведвалі дзяжурны лекар і псіхолаг следчага ізалятару.
Новыя «экстрэмісты»
«Экстрэмісцкімі» прызнаныя суполкі «МАЯ КРАІНА БЕЛАРУСЬ» ва ўсіх сацсетках.
Адпаведную пастанову вынес 2 лютага суд Чыгуначнага раёна Гомля. У лік суполак уваходзяць дзве старонкі «ВКонтакте», чатыры ў «Аднакласніках», адна супольнасць у Facebook і адзін акаўнт у Instagram.
Telegram-канал «МАЯ КРАІНА БЕЛАРУСЬ» атрымаў статус «экстрэмісцкага» яшчэ ў мінулым сакавіку. А напрыканцы кастрычніка ён стаў «экстрэмісцкім фармаваннем».
+5 палітвязняў
Лілія Ананян, Таццяна Біруля, Аляксандр Біруля, Аляксандр Міхайлаў і Галіна Міхальчук увайшлі сёння ў спіс вязняў сумлення, паведамляе «Вясна».
Адзіночная акцыя ў Менску
МГМ, belsat.eu
